ស្ថានភាពទឹកជំនន់នៅរដ្ឋ Assam ភាគឦសានរបស់ប្រទេសឥណ្ឌានៅតែមានភាពធ្ងន់ធ្ងរកាលពីថ្ងៃចន្ទដើមសប្ដាហ៍នេះ ដោយកម្រិតទឹកបានបន្តហក់ឡើងក្នុងផ្នែកជាច្រើននៃរដ្ឋមួយនេះ។សារព័ត៌មាន The Times of India បានរាយការណ៍ថា នាយកដ្ឋានឧតុនិយមឥណ្ឌា (IMD) បានព្យាករណ៍ថានឹងមានភ្លៀងធ្លាក់បន្ថែមទៀតសម្រាប់រដ្ឋមួយនេះ នៅក្នុងប៉ុន្មានថ្ងៃខាងមុខនេះ។

មជ្ឈមណ្ឌលឧតុនិយមប្រចាំតំបន់ (RMC) នៅទីក្រុង Guwahati បាននិយាយថា ភ្លៀងធ្លាក់ជាមធ្យមទំនងជានៅតំបន់ភាគច្រើននៃរដ្ឋ Assam ទន្ទឹមនឹងមានភ្លៀងធ្លាក់កាន់តែខ្លាំងថែមទៀតនៅតំបន់មួយចំនួន។ តំបន់ដាច់ស្រយាលខ្លះ អាចនឹងមានភ្លៀងធ្លាក់ខ្លាំងទៀតផង។

យោងតាមរបាយការណ៍របស់សារព័ត៌មាន The New Indian Express បានឱ្យដឹងថា ការស្លាប់ម្នាក់ទៀតត្រូវបានរាយការណ៍នៅរដ្ឋ Assam កាលពីថ្ងៃចន្ទ ដោយបង្កើនចំនួនអ្នកស្លាប់ដោយសារទឹកជំនន់នៅភាគឦសានដល់ ៣៨នាក់ ។ ក្នុងចំណោមអ្នកស្លាប់ទាំងនេះ មាន ១១ នាក់នៅរដ្ឋ Assam ៩នាក់នៅរដ្ឋArunachal Pradesh ៦នាក់នៅរដ្ឋ Meghalaya និង Mizoram បីនាក់នៅរដ្ឋ Sikkim ពីរនាក់នៅរដ្ឋ Tripura និងម្នាក់នៅរដ្ឋ Nagaland ។ តំបន់ទាំងមូលត្រូវបានរងផលប៉ះពាល់ដោយទឹកជំនន់ និងការរបំណាក់ដីដែលបណ្តាលមកពីភ្លៀងធ្លាក់ខ្លាំងជាបន្តបន្ទាប់។

សេចក្តីថ្លែងការណ៍របស់រដ្ឋាភិបាលបាននិយាយថា អ្នកទេសចរជាងមួយពាន់នាក់ដែលជាប់ក្នុងរដ្ឋ តំបន់ភ្នំហិម៉ាឡៃ Sikkim កំពុងត្រូវបានជម្លៀសចេញកាលពីថ្ងៃចន្ទ ហើយក្រុមជួយសង្គ្រោះរបស់កងទ័ព ក្នុងរដ្ឋ Meghalaya បានជួយសង្គ្រោះមនុស្សជាង៥០០នាក់ដែលជាប់ក្នុងតំបន់ទឹកជំនន់៕