បាតុកម្មជាច្រើន បានផ្ទុះឡើងនៅទូទាំងប្រទេសបូលីវី កាលពីថ្ងៃចន្ទ ទី២ ខែមិថុនា ខណៈក្រុមអ្នកគាំទ្រអតីតប្រធានាធិបតី លោក Evo Morales និងកសិករ បានចេញធ្វើបាតុកម្មតាមផ្លូវដើម្បីតវ៉ាប្រឆាំងនឹងវិបត្តិសេដ្ឋកិច្ចកាន់តែធ្ងន់ធ្ងររបស់ប្រទេស និងរដ្ឋាភិបាលបច្ចុប្បន្ន។

លោក Morales ដែលបានគ្រប់គ្រងប្រទេសពីឆ្នាំ ២០០៦ដល់ឆ្នាំ២០១៩ និងជាប្រធានាធិបតីជនជាតិដើមដំបូងរបស់ប្រទេសបូលីវី បានជំទាស់ទៅនឹងការមិនឲ្យចូលរួមក្នុងការបោះឆ្នោតប្រធានាធិបតីឆ្នាំ២០២៥ ដោយក្រុមគាំទ្រលោក បានរៀបចំការតវ៉ា និងបានបញ្ឈប់ចរាចរណ៍។

នៅទីក្រុង Cochabamba អ្នកគាំទ្ររបស់លោក Morales បានបិទផ្លូវហាយវ៉េ ដោយប្រើប្រាស់ថ្ម សំបកកង់រថយន្ត និងដើមឈើធំ។ ក្នុងការឆ្លើយតប រដ្ឋមន្ត្រីរដ្ឋាភិបាល បានចោទប្រកាន់ថា គោលបំណងនៃការបិទផ្លូវនេះគឺដើម្បី «ធ្វើពហិការការបោះឆ្នោតសកល» និង «ដើម្បីដាក់បេក្ខភាពនៃបុគ្គលដែលគ្មានលក្ខណៈសម្បត្តិ» ដោយលោកធានាថា ទាំងនគរបាល និងរដ្ឋាភិបាល នឹងមិនអនុញ្ញាតឱ្យទីក្រុងនានាត្រូវបានគេយកធ្វើជាចំណាប់ខ្មាំងសម្រាប់បំណងបោះឆ្នោតផ្ទាល់ខ្លួនឡើយ។

ក្នុងពេលជាមួយគ្នានេះ ក្រុមជនជាតិដើមភាគតិចបូលីវី ដែលគេស្គាល់ថា Red Ponchos បានដើរហែរក្បួនក្នុងទីក្រុង La Paz ដើម្បីតវ៉ាទៅនឹងកង្វះប្រេងឥន្ធនៈដែលកំពុងបន្តធ្វើឲ្យប៉ះពាល់ធ្ងន់ធ្ងរដល់វិស័យសេដ្ឋកិច្ច និងកសិកម្មដ៏សំខាន់របស់ប្រទេសតំបន់ភ្នំអង់មួយនេះ។ កង្វះប្រេងឥន្ធនៈធ្ងន់ធ្ងរ កំពុងចាប់ផ្តើមធ្វើឲ្យប៉ះពាល់ដល់សមត្ថភាពរបស់កសិករក្នុងការប្រមូលផលដំណាំ។