ក្រុមមន្ត្រីនីហ្សេរីយ៉ា បានប៉ាន់ប្រមាណថា អ្នកស្រុករាប់ពាន់នាក់ ត្រូវបង្ខំចិត្តជម្លៀសខ្លួនគេចពីគ្រោះថ្នាក់ ហើយមនុស្សជាង ៥០០នាក់ ដែលនៅតែបាត់ខ្លួន ត្រូវសន្មតថាបានស្លាប់បាត់ហើយនៅក្នុងគ្រោះទឹកជំនន់ បន្ថែមពីលើតួលេខអ្នកស្លាប់ផ្លូវការ ២០០នាក់ នៅក្នុងគ្រោះមហន្តរាយដែលចាប់ផ្ដើមកាលពីសប្ដាហ៍មុន ដោយនាំឱ្យអ្នកស្លាប់សរុបដែលអាចកើតមាន ឡើងដល់ ៧០០នាក់។

អង្គការសហប្រជាជាតិ បាននិយាយកាលពីថ្ងៃចន្ទ (០២ មិថុនា) ថា ទឹកជំនន់នៅភាគខាងលិចនីហ្សេរីយ៉ា បានបង្កការបំផ្លិចបំផ្លាញជុំវិញទីក្រុង Mokwa ក្នុងរដ្ឋ Niger ដោយបណ្តាលឱ្យមនុស្ស ៣.០០០នាក់ត្រូវជម្លៀសចេញ ដែលច្រើនជាងពាក់កណ្តាលនៃពួកគេគឺជាកុមារអាយុក្រោម ១២ឆ្នាំ។

ទីភ្នាក់ងារ និងដៃគូរបស់អង្គការសហប្រជាជាតិ កំពុងធ្វើការរួមគ្នាជាមួយរដ្ឋាភិបាលនីហ្សេរីយ៉ា ដើម្បីផ្តល់ជំនួយមនុស្សធម៌សំខាន់ៗដល់បុគ្គល និងក្រុមគ្រួសារនៅក្នុងរដ្ឋ NIger ដែលរងផលប៉ះពាល់។

ទឹកជំនន់ ដែលប្រហែលជាអាក្រក់បំផុតនៅក្នុងតំបន់នេះក្នុងរយៈពេល ៦០ឆ្នាំ បានហូរកាត់ក្រុង Mokwa នៃទីប្រជុំជន Tiffin Maza និង Anguwan Hausawa បន្ទាប់ពីភ្លៀងធ្លាក់យ៉ាងខ្លាំងឥតឈប់ឈរជាច្រើនថ្ងៃកាលពីសប្ដាហ៍មុន៕