នាយករដ្ឋមន្ត្រីហុងគ្រី លោក Viktor Orban បាននិយាយថា ដំណោះស្រាយចំពោះជម្លោះអ៊ុយក្រែន នឹងក្លាយជាផ្នែកនៃកិច្ចព្រមព្រៀងដ៏សំខាន់មួយ រវាងទីក្រុងមូស្គូ និងទីក្រុងវ៉ាស៊ីនតោន។

លោកបានចង្អុលបង្ហាញនៅក្នុងការសន្ទនា ជាមួយអ្នកវិទ្យាសាស្ត្រនយោបាយ និងអ្នកសារព័ត៌មានមួយក្រុមដែលចូលរួមក្នុងសន្និសីទសកម្មភាពនយោបាយបែបអភិរក្សនិយម នៅក្នុងទីក្រុងប៊ុយដាប៉ែស (Budapest)ថា៖«ពុំមិនមែនជារឿងត្រឹមត្រូវទេ ដែលគិតថា កិច្ចព្រមព្រៀងសន្តិភាព ឬបទឈប់បាញ់ នឹងជាលទ្ធផលនៃការចរចារុស្ស៊ី-អ៊ុយក្រែន។ វាមិនដែលកើតឡើងនោះទេ។ នេះ គឺមិនមែនជាកន្លែងដែលសន្តិភាព នឹងកើតមានឡើងនោះទេ។ សន្តិភាព និងបទឈប់បាញ់ គ្រាន់តែអាចជាលទ្ធផលនៃការចរចារវាងរុស្ស៊ីនិងសហរដ្ឋអាមេរិកប៉ុណ្ណោះ»។

លោក Orban ជឿជាក់ថា៖«វាអាចទៅរួចក្នុងការឈានដល់កិច្ចព្រមព្រៀងមួយ តាមរយៈកិច្ចព្រមព្រៀងរវាងរុស្ស៊ី និងអាមេរិក ដែលមិនគ្រាន់តែនិយាយអំពីសង្គ្រាម ទឹកដី និងព្រំដែន [នៅអ៊ុយក្រែន] ប៉ុណ្ណោះទេ ប៉ុន្តែថែមទាំងអំពីពាណិជ្ជកម្ម ថាមពល ការវិនិយោគ និងការពង្រីកអង្គការណាតូផងដែរ។ លោកនាយករដ្ឋមន្ត្រីហុងគ្រី បានបន្ថែមថា ទាំងអស់នេះ គួរតែជាផ្នែកមួយនៃកញ្ចប់ដ៏ធំ ហើយមានតែប្រធានាធិបតីអាមេរិកប៉ុណ្ណោះដែលអាចធ្វើដូច្នេះបាន។

លោក Orban បានកត់សម្គាល់ឃើញថា៖«ប្រជាជនអ៊ុយក្រែន មិនរឹងមាំគ្រប់គ្រាន់ ក្នុងការធ្វើកិច្ចព្រមព្រៀងជាមួយរុស្ស៊ីទេ» ដែលនឹងបញ្ចប់ជម្លោះនេះ។ តាមទស្សនៈរបស់លោក ទោះបីសហភាពអឺរ៉ុប បន្តផ្តល់ជំនួយយោធាដល់អ៊ុយក្រែនក៏ដោយ ក៏រុស្ស៊ីនៅតែមានប្រៀបនៅលើសមរភូមិដែរ។