មន្រ្តីជាន់ខ្ពស់អ៊ីស្រាអែល បានលើកឡើងថា រដ្ឋាភិបាលអ៊ីស្រាអែល បានប្តេជ្ញាធានាថា ក្រុមហាម៉ាស នឹងមិនគ្រប់គ្រងតំបន់ហ្កាហ្សាស្ទ្រីប នៅចុងបញ្ចប់នៃសង្រ្គាមបានទេ ប៉ុន្តែក៏មិនទាន់មានគម្រោងសម្រេចថាអ្នកណាដែលគ្រប់គ្រងទឹកដីប៉ាឡេស្ទីននេះនៅក្នុងសេណារីយ៉ូក្រោយជម្លោះដែរ។

លោក Tsach Saar អគ្គកុងស៊ុលអ៊ីស្រាអែលនៅទីក្រុងញូវយ៉ក បានប្រាប់សារព័ត៌មាន Newsweek ថា "មិនទាន់កំណត់បានទេថាអ្នកណានឹងទៅទីនោះនៅពេលសង្គ្រាមបញ្ចប់ ប៉ុន្តែអ្វីដែលប្រាកដគឺមិនមែនក្រុមហាម៉ាសទេ ហើយនៅពេលក្រុមនេះត្រូវកម្ចាត់ អ៊ីស្រាអែលនឹងធ្វើការរួមគ្នាជាមួយសម្ព័ន្ធមិត្ត រួមទាំងប្រទេសក្នុងតំបន់ និងអ្នកជិតខាង ដើម្បីស្វែងរកដំណោះស្រាយសម្រាប់ថ្ងៃក្រោយ"។

លោក Saar បានបញ្ជាក់ជំហររបស់ខ្លួនថា "មិនមែនជាក្រុមហាម៉ាសទេ ហើយក៏មិនមែនជាអ៊ីស្រាអែលដែរ" ដែលគ្រប់គ្រងតំបន់ហ្កាហ្សា បន្ទាប់ពីជម្លោះបញ្ចប់។ ការអត្ថាធិប្បាយនេះកើតឡើងស្របពេលភាពជាប់គាំងជាក់ស្តែងថ្មីក្នុងការចរចាឆ្ពោះទៅរកបទឈប់បាញ់ ដែលសម្រុះសម្រួលដោយសហរដ្ឋអាមេរិក អេហ្ស៊ីប និងកាតា នៅទីក្រុងដូហា។

អ៊ីស្រាអែលបានធ្វើសង្រ្គាមជាច្រើនដងមកហើយនៅហ្កាហ្សា ក្នុងពីរទសវត្សរ៍កន្លងមកនេះ ប៉ុន្តែជម្លោះបច្ចុប្បន្ន ដែលបង្កដោយការវាយប្រហារដឹកនាំដោយក្រុមហាម៉ាស ក្នុងខែតុលា ឆ្នាំ២០២៣ គឺជាជម្លោះយូរបំផុត និងមានអ្នកស្លាប់ច្រើនបំផុតនៅហ្កាហ្សា។ ខណៈដែលជម្លោះកាលពីអតីតកាលទាំងអស់ បានបញ្ចប់នៅក្នុងបទឈប់បាញ់ដែលទុកឱ្យក្រុមហាម៉ាសនៅតែគ្រប់គ្រងហ្កាហ្សា អ៊ីស្រាអែលបានអះអាងតាំងពីដើមដំបូងនៃសង្រ្គាមបច្ចុប្បន្នថា ប្រតិបត្តិការយោធារបស់ខ្លួននឹងមិនបញ្ចប់ទេ រហូតដល់ក្រុមហាម៉ាស ត្រូវបានកម្ចាត់យូរអង្វែង៕