ប្រទេសចិន កំពុងកែទម្រង់ពាណិជ្ជកម្មសព្វាវុធសកល ដោយការលេចឡើងក្លាយជាអ្នកផ្គត់ផ្គង់សព្វាវុធដ៏សំខាន់បំផុតមួយ ខណៈលុបបំបាត់ភាពពឹងផ្អែកជាប្រវត្តិសាស្ត្ររបស់ខ្លួនលើការនាំចូលពីបរទេស។

ក្នុងប៉ុន្មានឆ្នាំថ្មីៗនេះ យានដ្រូន មីស៊ីល និងយន្តហោះចម្បាំងដែលផលិតដោយចិន ត្រូវបាននាំចេញទៅកាន់ប្រទេសចំនួន ៤៤ ទូទាំងពិភពលោក រាប់ចាប់ពីប៉ាគីស្ថាន និងមីយ៉ាន់ម៉ា ទៅដល់នីហ្សេរីយ៉ា និងអាល់ហ្សេរី។ របាយការណ៍ថ្មីមួយរបស់វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) បញ្ជាក់ពីការផ្លាស់ប្តូរនេះ ខណៈចិន បង្កើនផលិតកម្មក្នុងស្រុក និងខិតទៅជិតភាពគ្រប់គ្រាន់ដោយខ្លួនឯងលើវិស័យការពារជាតិ។

កាលពីខែមុន ប៉ាគីស្ថានអះអាងថា យន្តហោះដែលផលិតដោយចិនរបស់ខ្លួន បានបាញ់ទម្លាក់យន្តហោះឥណ្ឌាចំនួន ៦គ្រឿង រួមទាំង Rafale ដែលផលិតដោយបារាំងចំនួន ៣គ្រឿង នៅក្នុងការប៉ះទង្គិចតាមព្រំដែនដ៏ខ្លីមួយ ប៉ុន្តែមានភាពតានតឹងខ្លាំង។ ការប៉ះទង្គិចនេះត្រូវបានមើលឃើញថាជាការសាកល្បងដ៏កម្រនៃអាវុធរបស់ចិន ប្រឆាំងនឹងផ្នែករឹងរបស់លោកខាងលិច។

យោងតាមរបាយការណ៍ខែមីនា របស់ SIPRI ការនាំចូលអាវុធរបស់ចិន បានធ្លាក់ចុះ ៦៤% នៅចន្លោះឆ្នាំ២០២០ និង២០២៤ បើប្រៀបធៀបនឹងរយៈពេល ៥ឆ្នាំមុន ហើយការនាំចេញទៅទូទាំងអាស៊ី អាហ្វ្រិក និងកន្លែងផ្សេងទៀតបានកើនឡើង។ ប៉ាគីស្ថាន គឺជាអ្នកទិញធំជាងគេដែលមានចំនួន ៦៣% នៃការនាំចេញអាវុធសរុបរបស់ចិន ចន្លោះឆ្នាំ២០២០ និង២០២៤។

ការផ្លាស់ប្តូរយ៉ាងខ្លាំងនេះឆ្លុះបញ្ចាំងពីភាពជឿនលឿននៅក្នុងការផលិតម៉ាស៊ីនក្នុងស្រុក យន្តហោះប្រយុទ្ធ និងឧទ្ធម្ភាគចក្រ ដោយបញ្ចប់ការពឹងផ្អែកជាច្រើនទសវត្សរ៍លើបច្ចេកវិទ្យារុស្ស៊ី និងអឺរ៉ុប៕