ភាគហ៊ុនអាស៊ីបានហក់ឡើង នៅថ្ងៃអង្គារ (ទី៣ ខែមិថុនា) ខណៈដែលអ្នកវិនិយោគបានបន្តតាមដានយ៉ាងដិតដល់ ចំពោះសង្គ្រាមពាណិជ្ជកម្ម រវាងចិន និងសហរដ្ឋអាមេរិក ស្របពេលមានការរំពឹងទុក ដែលថា មេដឹកនាំប្រទេសទាំង២ នឹងធ្វើការពិភាក្សាគ្នា ក្នុងពេលឆាប់ៗនេះ។

បន្ទាប់ពីមានភាពស្ងប់ស្ងាត់មួយរយៈទាក់ទងនឹងស្ថានភាពពន្ធ ប្រធានាធិបតីអាមេរិក លោក Donald Trump កាលពីចុងសប្តាហ៍កន្លងមក បានចោទប្រកាន់ទីក្រុងប៉េកាំងថា បានរំលោភលើកិច្ចព្រមព្រៀងកាលពីខែមុន ដែលត្រូវបានធ្វើឡើង ដើម្បីកាត់បន្ថយអត្រាពន្ធខ្ពស់ដែលដាក់លើគ្នាទៅវិញមក ហើយបានគំរាមដំឡើងពន្ធទ្វេដងលើដែកថែប និងអាលុយមីញ៉ូម។

ចំណាត់ការនេះបានធ្វើឲ្យទីផ្សារភាគហ៊ុនអាស៊ីរង្គោះរង្គើ កាលពីថ្ងៃចន្ទ (ទី២ ខែមិថុនា) ប៉ុន្តែក្ដីសង្ឃឹម ដែលថា ប្រធានាធិបតីអាមេរិក នឹងជជែកជាមួយសមភាគីចិន លោក ស៊ី ជីនពីង (Xi Jinping) ពោលគឺប្រហែលជាអាចកើតឡើងក្នុងសប្តាហ៍នេះនោះ បានផ្តល់ឲ្យអ្នកវិនិយោគនូវពន្លឺនៃការមានលទ្ធផលវិជ្ជមានខ្លះៗ។ លោក Trump បានបង្ហាញទំនុកចិត្តថា ការពិភាក្សាជាមួយលោក ស៊ី អាចជួយសម្រាលភាពតានតឹងពាណិជ្ជកម្មបាន ទោះបីជាការវាយប្រហារចុងក្រោយរបស់លោក ចំពោះមហាអំណាចអាស៊ី បានគំរាមកំហែងដល់កិច្ចព្រមព្រៀងផ្អាកជម្លោះពន្ធដែលមានរយៈពេលជាច្រើនសប្តាហ៍រវាងប្រទេសទាំង២ក៏ដោយ។

យ៉ាងក្ដី គេនៅមិនទាន់ច្បាស់ទេថា តើលោក ស៊ី ចាប់អារម្មណ៍លើការសន្ទនានេះដែរ ឬទេ ដោយការជជែកគ្នាតាមទូរសព្ទចុងក្រោយ រវាងមេដឹកនាំទាំង២ គឺនៅប៉ុន្មានថ្ងៃមុនពេលពិធីឡើងកាន់តំណែងរបស់លោក Trump ក្នុងខែមករា ប៉ុន្តែទីប្រឹក្សាសេដ្ឋកិច្ចរបស់ប្រធានាធិបតីអាមេរិក លោក Kevin Hassett បានផ្តល់សញ្ញាកាលពីថ្ងៃអាទិត្យចុងសប្ដាហ៍កន្លងមកថា ក្រុមមន្ត្រីកំពុងរំពឹងមានអ្វីកើតឡើង នៅក្នុងសប្តាហ៍នេះ។

បើទោះបីជាមិនមានអ្វីថ្មីកើតឡើង ជុំវិញបញ្ហានេះក៏ដោយ ក៏អ្នកវិនិយោគ នៅថ្ងៃអង្គារ បានឆ្លៀតឱកាសទិញយកភាគហ៊ុនដែលទើបបានលក់ថ្មីៗនេះ។ ទីផ្សារភាគហ៊ុន នៅទីក្រុងហុងកុងបានឡើងជាង ១ភាគរយ ខណៈហ៊ុននៅទីក្រុងសៀងហៃ ក្រោយផ្អាកមួយសប្ដាហ៍ បានវិលមកមានសកម្មភាពជួញដូរវិញជាមួយនឹងតម្លៃដ៏រឹងមាំ។ តម្លៃភាគហ៊ុនហក់ឡើង ក៏កើតមានផងដែរ នៅក្នុងទីក្រុងតូក្យូ (ជប៉ុន) ស៊ីដនី (អូស្ត្រាលី) ទីក្រុង Wellington (នូវែលសេឡង់) សិង្ហបុរី (សិង្ហបុរី) តៃប៉ិ (កោះតៃវ៉ាន់) និងម៉ានីល (ហ្វីលីពីន)៕