អ្នកស្រី Victoria Rose ដែលជាគ្រូពេទ្យវះកាត់អង់គ្លេសបានចាត់ទុកឈុតឆាកនៅតំបន់ហ្កាហ្សាថាជាការសម្លាប់រង្គាលទាំងស្រុង ក្រោយក្រសួងសុខាភិបាលប៉ាឡេស្ទីន និយាយថា ជនប៉ាឡេស្ទីនជាង ៣០នាក់ ត្រូវបានសម្លាប់ ហើយមនុស្សជិត ១៧០នាក់ផ្សេងទៀត បានរងរបួសកាលពីថ្ងៃអាទិត្យ នៅភាគខាងត្បូងហ្កាហ្សា ស្ថិតនៅជិតទីតាំងចែកចាយស្បៀងអាហារ ។

 សាក្សីរាយការណ៍ថា ទាហានអ៊ីស្រាអែល បានបាញ់ស្រោចលើមនុស្សដែលព្យាយាមប្រមូលជំនួយ ដែលការលើកឡើងបែបនេះ ត្រូវបានអ៊ីស្រាអែលធ្វើការច្រានចោលទាំងស្រុង ។

 អ្នកស្រី Rose និយាយនៅក្នុងវីដេអូដែលបញ្ចេញដោយអាជ្ញាធរប៉ាឡេស្ទីនថា ឆកសមុទ្រទាំងអស់ពោពេញដោយមនុស្ស ហើយពួកគេទាំងអស់សុទ្ធតែរងរបួសដោយសារត្រូវគ្រាប់កាំភ្លើង ។

 ទីភ្នាក់ងារព័ត៌មានរ៉យទ័រអាចបញ្ជាក់បានពីទីតាំងដែលអ្នកស្រី Rose និយាយពីការរចនាផ្នែកខាងក្នុងអគារមន្ទីរពេទ្យ និងប្លង់មន្ទីរពេទ្យដោយផ្គូរផ្គងជាមួយរូបភាពឯកសារ ។

 ក្រុមសាក្សីនិយាយថា យោធាអ៊ីស្រាអែលបានបាញ់រះ ពេលដែលជនប៉ាឡេស្ទីនរាប់ពាន់នាក់ជួបជុំគ្នាដើម្បីទទួលយកជំនួយស្បៀងអាហារនៅជិតទីតាំងចែកចាយជំនួយស្ថិតក្នុងទីក្រុង Rafah ដែលប្រតិបត្តិការដោយមូលនិធិមនុស្សធម៌ហ្កាហ្សាមានមូលដ្ឋាននៅសហរដ្ឋអាមេរិក ។ 

យោធាអ៊ីស្រាអែល និយាយថា ការស៊ើបអង្កេតដំបូងរកឃើញថា ទាហានពុំបានបាញ់ប្រហារជនស៊ីវិលនោះទេ ពេលដែលពួកគេនៅជិត ឬនៅក្នុងទីតាំងចែកចាយជំនួយ ។

 ក្រសួងសុខាភិបាលហ្កាហ្សាគ្រប់គ្រងដោយក្រុមហាម៉ាស និយាយថា មនុស្ស ៣១នាក់ ត្រូវបានសម្លាប់ ដោយសាររបួសត្រូវគ្រាប់កាំភ្លើងមួយគ្រាប់ចំក្បាល ឬដើមទ្រូង ពីការបាញ់ប្រហាររបស់អ៊ីស្រាអែល ពេលដែលពួកគេជួបជុំគ្នានៅសង្កាត់ Al-Alam ជាទីតាំងចែកចាយជំនួយនៅក្នុងទីក្រុង Rafah ។ ពួកគេនិយាយថា មនុស្ស ១៦៩នាក់ បានរងរបួស ៕