អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស (Antonio Guterres) កាលពីថ្ងៃចន្ទបានអំពាវនាវឲ្យមានការដោះលែងជាបន្ទាន់ និងដោយគ្មានលក្ខខណ្ឌនូវបុគ្គលិកUN ដែលត្រូវបានឃុំខ្លួនដោយក្រុមហ៊ួទី នៅក្នុងប្រទេសយេម៉ែន។

លោកបាននិយាយនៅក្នុងសេចក្តីថ្លែងការណ៍មួយថា៖«ខែមិថុនានេះ គឺមានរយៈពេលមួយឆ្នាំ ចាប់តាំងពីការឃុំខ្លួនដោយបំពានលើបុគ្គលិករាប់សិបនាក់មកពីអង្គការសហប្រជាជាតិ អង្គការជាតិ និងអន្តរជាតិ អង្គការសង្គមស៊ីវិល និងបេសកកម្មការទូតដោយអាជ្ញាធរហ៊ួទី នៅក្នុងប្រទេសយេម៉ែន» ។ ខ្ញុំបន្តការអំពាវនាវរបស់ខ្ញុំ ឲ្យមានការដោះលែងជាបន្ទាន់ និងដោយគ្មានលក្ខខណ្ឌ រួមទាំងអ្នកដែលត្រូវចាប់ឃុំខ្លួន តាំងពីឆ្នាំ ២០២១ និង ២០២៣ ហើយថ្មីៗបំផុត ក្នុងខែមករា ឆ្នាំនេះ»។

លោក ហ្គុយតឺរេស បាននិយាយថា អង្គការសហប្រជាជាតិ និងដៃគូមនុស្សធម៌របស់ខ្លួន មិនគួរត្រូវបានគេកំណត់គោលដៅ ចាប់ខ្លួន ឬឃុំខ្លួនឡើយ ខណៈពេលដែលកំពុងអនុវត្តអាណត្តិរបស់ពួកគេ ដើម្បីជាប្រយោជន៍ដល់មនុស្សដែលពួកគេបម្រើ។ «ការបន្តឃុំខ្លួនសហសេវិករបស់យើងតាមអំពើចិត្ត គឺជាអំពើអយុត្តិធម៌យ៉ាងខ្លាំងប្រឆាំងនឹងអ្នកដែលលះបង់ជីវិតរបស់ពួកគេ ក្នុងការផ្តល់ជំនួយសង្គ្រោះជីវិត និងការគាំទ្រដល់ប្រជាជនយេម៉ែន។ ទង្វើនេះ បានធ្វើឲ្យមានឧបសគ្គបន្ថែមលើសមត្ថភាពរបស់យើង ក្នុងប្រតិបត្តិការប្រកបដោយប្រសិទ្ធភាព និងធ្វើឲ្យខូចដល់កិច្ចខិតខំប្រឹងប្រែងសម្រុះសម្រួល ដើម្បីធានាផ្លូវឆ្ពោះទៅរកសន្តិភាព»។

លោកបានគូសបញ្ជាក់ពីឱកាសនៃពិធីបុណ្យ Eid Al-Adha ដោយលើកឡើងថា ថ្ងៃឈប់សម្រាករបស់  អ្នកកាន់សាសនាមូស្លីម គឺជាពេលវេលាមួយ ដើម្បីបង្ហាញពីក្តីមេត្តា និងបញ្ចប់ទុក្ខលំបាករបស់គ្រួសារ ដែលប្រឈមនឹងការប្រារព្ធពិធីបុណ្យមួយផ្សេងទៀត ដោយគ្មានមនុស្សជាទីស្រឡាញ់របស់ពួកគេ។

លោកបាននិយាយថា អង្គការសហប្រជាជាតិ នឹងបន្តធ្វើការតាមរយៈគ្រប់បណ្តាញ ដែលអាចធ្វើទៅបានដើម្បីធានាការដោះលែងពួកគេ ដោយលោកបានអំពាវនាវឲ្យប្រទេសជាសមាជិកអង្គការសហប្រជាជាតិបន្តបង្ហាញពីសាមគ្គីភាពរបស់ពួកគេ ជាមួយអ្នកដែលត្រូវបានឃុំខ្លួន និងបង្កើនការតស៊ូមតិឆ្ពោះទៅរកការដោះលែងពួកគេ។