មន្ត្រីដែលបានដំឡើងដោយរុស្ស៊ីបាននិយាយនៅព្រឹកថ្ងៃអង្គារនេះថា ការបាញ់ផ្លោង និងការវាយប្រហារដោយយានដ្រូនរបស់អ៊ុយក្រែន បានបង្កឲ្យដាច់ថាមពលអគ្គិសនីនៅដែនដីដែលគ្រប់គ្រងដោយរុស្ស៊ី ក្នុងតំបន់ Zaporizhzhia និង Kherson ភាគខាងត្បូងប្រទេសអ៊ុយក្រែន។

ក្រុមមន្ត្រីបានបញ្ជាក់ថា មិនមានផលប៉ះពាល់ដល់ប្រតិបត្តិការឡើយ នៅឯស្ថានីយ៍ថាមពលនុយក្លេអ៊ែរ Zaporizhzhia ជារោងចក្រនុយក្លេអ៊ែរដ៏ធំបំផុតរបស់អឺរ៉ុបដែលត្រូវបានរឹបអូសដោយរុស្ស៊ី តាំងពីប៉ុន្មានសប្តាហ៍ដំបូងបន្ទាប់ពីមានការលុកលុយរបស់ទីក្រុងមូស្គូលើអ៊ុយក្រែន កាលពីខែកុម្ភៈ ឆ្នាំ២០២២។

មន្ត្រីរុស្ស៊ីដែលកំពុងគ្រប់គ្រងរោងចក្រនេះ បាននិយាយថា កម្រិតវិទ្យុសកម្ម គឺធម្មតានៅក្នុងរោងចក្រនេះ ដែលមិនដំណើរការ តែស្ថិតក្រោមការឃ្លាំមើល និងដែលមិនមានផលិតថាមពលអ្វីឡើយ នាពេលនេះ។

អភិបាលដែលត្រូវបានលើកបន្តុបដោយរុស្ស៊ី នៅក្នុងតំបន់ទាំង២ បានប្រាប់ឲ្យដឹងថា ការវាយប្រហាររបស់អ៊ុយក្រែន បានជំរុញឲ្យអាជ្ញាធរដាក់ចេញនូវវិធានការសង្គ្រោះបន្ទាន់ និងប្តូរទីតាំងសំខាន់ៗ ដើម្បីបម្រុងទុកប្រភពថាមពល។

លោក Yevgeny Belitsky អភិបាលដែលលើកបន្តុបដោយរុស្ស៊ី បានសរសេរនៅលើកម្មវិធីផ្ញើសារ Telegram ថា ថាមពលត្រូវបានកាត់ផ្ដាច់នៅគ្រប់ផ្នែកទាំងអស់នៃតំបន់ Zaporizhzhia ដែលស្ថិតក្រោមការគ្រប់គ្រងរបស់រុស្ស៊ី។

ក្នុងតំបន់នៅជាប់គ្នា Kherson នៅចុងភាគខាងលិច អភិបាលដែលត្រូវបានតែងតាំងដោយរុស្ស៊ី លោក Vladimir Saldo បាននិយាយថា កម្ទេចកម្ទីយានដ្រូនបានធ្វើស្ថានីយរងចំនួន២ ខូចខាត ដោយកាត់ផ្តាច់ចរន្តអគ្គិសនីពីអ្នកស្រុកជាង ១០០.០០០នាក់នៃទីក្រុង និងភូមិចំនួន ១៥០ នៅក្នុងតំបន់គ្រប់គ្រងដោយរុស្ស៊ី។ លោកបានបន្តថា ក្រុមសង្គ្រោះបន្ទាន់កំពុងធ្វើការដើម្បីស្តារថាមពលឡើងវិញឲ្យបានឆាប់រហ័ស៕