ទូរទស្សន៍រដ្ឋចិន CCTV រាយការណ៍ថា ក្រុមអាជ្ញាធរនៅខេត្តភាគនិរតី Yunnan ប្រទេសចិន បានចល័តកម្លាំងជួយសង្រ្គោះ និងបានចុះប្រតិបត្តិការជួយសង្រ្គោះគ្រោះមហន្តរាយសម្រាប់ទឹកជំនន់ធ្ងន់ធ្ងរ បំណាក់ដី និងផ្លូវខូច បន្ទាប់ពីភ្លៀងធ្លាក់ខ្លាំងអស់រយៈពេលជាច្រើនថ្ងៃរួចមក ។

ការធ្វើចរាចរណ៍ត្រូវបានអាក់ខាននៅតាមផ្លូវហាយវ៉េមួយចំនួន ក្រោយបំណាក់ដីបាក់សង្កត់លើផ្លូវទាំងអស់នោះ ។

រូបភាពវីដេអូឃ្លីបដែលបានចុះផ្សាយដោយទូរទស្សន៍រដ្ឋចិន CCTV ឃើញប្រជាពលរដ្ឋនៅក្នុងស្រុក Deqin ស្ថិតក្នុងខេត្តស្វយ័តទីបេតិ៍ Diqing ត្រូវបានសង្រ្គោះ ក្រោយទឹកជំនន់ធ្ងន់ធ្ងរបណ្តាលឲ្យផ្លូវបាក់ ។ ប្រជាពលរដ្ឋនៅស្រុក Deqin ត្រូវបានជួយសង្រ្គោះ ឬបំលាស់ទីទៅកាន់ទីទួលសុវត្ថិភាព ។

 នៅខេត្តស្វយ័ត Nujiang Lisu ភ្លៀងធ្លាក់ខ្លាំងបន្តវាយប្រហារតំបន់រស់នៅរបស់អ្នកស្រុក ពេលដែលទឹកទន្លេហូរប្រៀបច្រាំង បានជន់លិចផ្ទះសម្បែងប្រជាពលរដ្ឋ និងដំណាំ ។

 ការងារជួសជុលផ្លូវ និងបង្គោលភ្លើង កំពុងធ្វើឡើង ហើយក្រុមអាជ្ញាធរ បានព្រមានថា ភ្លៀងធ្លាក់ខ្លាំងបន្ថែមទៀត ត្រូវបានព្យាករថានឹងកើតមាននៅខេត្ត Diqing និងខេត្ត Nujiang Lisu នារយៈពេលប៉ុន្មានថ្ងៃខាងមុខនេះ ។

ទូរទស្សន៍ CCTV រាយការណ៍ថា ប្រតិបត្តិការជួយសង្រ្គោះ និងគ្រឿងចក្រធន់ធ្ងន់ ត្រូវបានបញ្ជូនទៅបោសសម្អាតផ្លូវ និងកម្ទេចកម្ទីចេញពីដងផ្លូវនៅទីក្រុង Guilin ស្ថិតក្នុងតំបន់ស្វយ័ត Guangxi Zhuang ។

មន្ទីរឧតុនិយមជាតិចិន បានព្យាករណ៍ថា ភ្លៀងខ្លាំងនឹងបន្តបង្អុរចុះរយៈពេលប៉ុន្មានថ្ងៃទៀតនៅ ខេត្ត Yunnan ខណៈនៅតំបន់ភាគឦសាន ត្រូវបានគេរំពឹងថានឹងមានភ្លៀងផ្គររន្ទះញឹកញាប់ និងធ្ងន់ធ្ងរ ៕