ក្នុងអំឡុងពេលសន្ទនាជាមួយអ្នកសារព័ត៌មាន ប្រធានាធិបតីអ៊ុយក្រែន លោក Volodymyr Zelenskyy បានប្រាប់ឲ្យដឹងថា សហរដ្ឋអាមេរិក និងសហភាពអឺរ៉ុប (EU) កំពុងសម្របសម្រួលដាក់ទណ្ឌកម្ម នាពេលខាងមុខ ប្រឆាំងនឹងរុស្ស៊ីជាលើកដំបូង។

លោកបាននិយាយថា បច្ចុប្បន្នភាគីអាមេរិក ជាពិសេសសមាជិកព្រឹទ្ធសភាខាងបក្សសាធារណរដ្ឋ លោក Lindsey Graham រួមជាមួយសមាជិកព្រឹទ្ធសភាខាងបក្សប្រជាធិបតេយ្យ លោក Richard Blumenthal និងសហការីផ្សេងទៀត កំពុងរៀបចំដាក់ទណ្ឌកម្មរួមគ្នាប្រឆាំងនឹងរុស្ស៊ី។

លោក Zelenskyy បាននិយាយថា៖ «ពួកលោកទាំង២ បានចាប់ផ្តើមសម្របសម្រួលជាមួយ EU ហើយនោះជាសញ្ញាល្អណាស់ ពីព្រោះកញ្ចប់ទណ្ឌកម្មរបស់អាមេរិក គឺរឹងមាំ ហើយកញ្ចប់ទណ្ឌកម្មអឺរ៉ុបទី១៨ ក៏នឹងរឹងមាំផងដែរ។ ប្រសិនបើពួកគេបានចាប់ផ្តើមការសម្របសម្រួល នោះខ្ញុំជឿថា នឹងមានកញ្ចប់ដ៏រឹងមាំចំនួន២។ ប៉ុន្តែជារឿងគួរឲ្យសោកស្ដាយ វាមិនស្ថិតនៅលើការសម្រេចរបស់យើងនោះទេ»។

គួរបញ្ជាក់ថា លោក Graham រួមជាមួយលោក Blumenthal គឺជាសហអ្នកនិពន្ធនៃសេចក្ដីស្នើច្បាប់ដាក់ទណ្ឌកម្មប្រឆាំងនឹងរុស្ស៊ី។ ក្នុងដំណើរទស្សនកិច្ចទៅកាន់ក្រុងគីវ លោក Graham បានប្រាប់ថា ព្រឹទ្ធសភាអាចនឹងចាប់ផ្តើមពិនិត្យសេចក្ដីស្នើច្បាប់ដាក់ទណ្ឌកម្មប្រឆាំងនឹងរុស្ស៊ី នៅសប្តាហ៍ក្រោយ។ កាលពីថ្ងៃទី២០ ខែឧសភា សហភាពអឺរ៉ុបបានអនុម័តកញ្ចប់ទណ្ឌកម្មលើកទី១៧ របស់ខ្លួនប្រឆាំងនឹងរុស្ស៊ី ហើយកំពុងធ្វើការលើការរឹតបន្តឹងបន្ថែមទៀតរួចរាល់ហើយ៕