វិទ្យាស្ថានជាតិវិទ្យាសាស្រ្ត និងបច្ចេកវិទ្យា Chung-Shan (NCSIST) គ្រប់គ្រងដោយយោធាកោះតៃវ៉ាន់នៅថ្ងៃអង្គារនេះ បានចុះហត្ថលេខាលើអនុស្សារណៈយោគយល់ជាមួយសាកលវិទ្យាល័យជាតិ Chung Cheng ដើម្បីពន្លឿនកិច្ចខិតខំបង្កើតខ្សែសង្វាក់ផ្គត់ផ្គង់យានដ្រូនដែលធន់ មិនពឹងផ្អែកចិន ។

លោក Lee Shih-chiang គឺជាប្រធាន NCSIST និយាយថា ចាប់ផ្តើមនៅឆ្នាំក្រោយទៅ និងមានរយៈពេល ៥ឆ្នាំ អាជ្ញាធរកោះតៃវ៉ាន់នឹងវិនិយោគថវិកា ១ពាន់លានដុល្លារ លើការស្រាវជ្រាវ និងអភិឌ្ឍឧស្សាហកម្មយានដ្រូន ក៏ដូចជាប្លង់យុទ្ធសាស្រ្តនៃខ្សែសង្វាក់ផ្គត់ផ្គង់ឧស្សាហកម្មទាំងមូល ។

កាលពីខែធ្នូឆ្នាំមុន កោះតៃវ៉ាន់ បានណែនាំគំនិតផ្តួចផ្តើមថ្មីឈ្មោះ “Chips Team Taiwan” ដែលនឹងជំរុញក្រុមហ៊ុនកោះតៃវ៉ាន់ ផលិតផ្កាយរណប យានដ្រូន និងរូបយន្តក្នុងស្រុកបន្ថែមទៀត ក្នុងនោះយានដ្រូនជាអាទិភាពកំពូល ។

កាលពីមុន កោះតៃវ៉ាន់ បានកំណត់គោលដៅក្លាយជាមជ្ឈមណ្ឌលផលិតយានដ្រូនប្រចាំអាស៊ី ។ ទីភ្នាក់ងារព័ត៌មានរ៉យទ័រ រាយការណ៍ថា អាជ្ញាធររបស់ពួកគេ នឹងរើសយកក្រុមហ៊ុនផលិតយានដ្រូនពាណិជ្ជកម្មរបស់កោះតៃវ៉ាន់ ជាមួយនឹងក្រុមហ៊ុនអវកាស និងក្រុមហ៊ុនអាកាសចរណ៍ ដើម្បីធ្វើការជាមួយយោធាសម្រាប់បង្កើតឲ្យបានលឿនខ្សែសង្វាក់ផ្គត់ផ្គង់យានដ្រូនគ្រប់គ្រាន់ខ្លួនឯង ៕