គណបក្ស PVV របស់មេដឹកនាំស្តាំនិយមជ្រុលហូឡង់លោក Geert Wilders បានសម្រេចចែកផ្លូវជាមួយក្រុមចម្រុះ នៅថ្ងៃអង្គារ (ទី៣ ខែមិថុនា) នេះ ជាការសម្រេចដែលនឹងធ្វើឲ្យរដ្ឋាភិបាលស្តាំនិយមដួលរលំ ហើយទំនងជានឹងនាំឲ្យមានការបោះឆ្នោតថ្មី។

លោក Wilders បានលើកឡើងថា ដៃគូក្នុងរដ្ឋាភិបាលចម្រុះរបស់លោក មិនមានឆន្ទៈគាំទ្រដល់គំនិតរបស់លោក ក្នុងការទប់ស្កាត់ការធ្វើអន្តោប្រវេសន៍សុំសិទ្ធិជ្រកកោននោះឡើយ។ ហើយតាមរយៈការបង្ហោះនៅលើបណ្ដាញសង្គម X លោក Wilders បានឲ្យដឹងថា៖ «មិនមានហត្ថលេខានៅក្នុងផែនការទប់ស្កាត់មិនឲ្យមានការសុំសិទ្ធិជ្រកកោនរបស់យើងនោះទេ។ គណបក្ស PVV ត្រូវចាកចេញពីរដ្ឋាភិបាល»។

លោក Wilders បានប្រាប់ថា រូបលោកបានជូនដំណឹងដល់នាយករដ្ឋមន្រ្តី លោក Dick Schoof ថា រដ្ឋមន្ត្រីទាំងអស់ពីគណបក្ស PVV របស់លោក នឹងចាកចេញពីរដ្ឋាភិបាល។ លោក Schoof មិនទាន់មានប្រតិកម្ម ចំពោះការលាលែងនេះទេ។ ការសម្រេចដ៏គួរឲ្យភ្ញាក់ផ្អើលរបស់លោក Wilders បានបញ្ចប់សម្ព័ន្ធភាពដ៏ផុយស្រួយរួចទៅហើយ ដែលបានជួបការលំបាកក្នុងការឈានដល់ការឯកភាពណាមួយ គិតចាប់តាំងពីដើមដំបូងនៃការបង្កើតរដ្ឋាភិបាលចម្រុះ កាលពីខែកក្កដាឆ្នាំមុន។

ការសម្រេចនេះទំនងជានឹងនាំឲ្យមានការបោះឆ្នោតថ្មី ក្នុងរយៈពេល ២-៣ខែខាងមុខ ខណៈវាបានបន្ថែមភាពមិនច្បាស់លាស់ផ្នែកនយោបាយដល់ប្រទេសសេដ្ឋកិច្ចធំទី ៥ របស់តំបន់ចាយប្រាក់អឺរ៉ូ។ ហើយវាក៏ទំនងជានឹងពន្យារពេលផងដែរដល់ការសម្រេច ក្នុងការបង្កើនជាប្រវត្តិសាស្ត្រនូវការចំណាយលើវិស័យការពារជាតិ ដើម្បីបំពេញតាមគោលដៅថ្មីរបស់អង្គការណាតូ (NATO)៕