ភ្នំពេញ ៖មន្រ្តីជាន់ខ្ពស់នៃស្ថានទូតចក្រភពអង់គ្លេសប្រចាំនៅកម្ពុជា បានបញ្ជាក់ឱ្យដឹងថា នឹងបន្តសកម្មភាពក្នុងការចូលរួមផ្សព្វផ្សាយសក្តានុពលព្រលានយន្តហោះអន្តរជាតិតេជោ និងកាលានុវត្តភាពវិនិយោគរបស់កម្ពុជា ទៅកាន់ក្រុមហ៊ុនឯកជននៅចក្រភពអង់គ្លេសឱ្យកាន់តែទូលំទូលាយ តាមរយៈវីដេអូខ្លីៗនៅក្នុងបណ្តាញសង្គមនានារបស់ឯកឧត្តម។

​មានប្រសាសន៍ប្រាប់បណ្តាញអ្នកសារព័ត៌មាន ក្រោយបញ្ចប់ដំណើរទស្សនកិច្ចនៅអាយានដ្ឋានអន្តរជាតិតេជោ កាលពីព្រឹកថ្ងៃទី៣ ខែមិថុនានេះ ឯកឧត្តម Dominic Williams ឯកអគ្គរាជទូតចក្រភពអង់គ្លេសប្រចាំនៅកម្ពុជា បានលើកឡើងថា គិតមកដល់ពេលនេះ គឺជាលើកទី៥ហើយ ដែលឯកឧត្តមបានបំពេញទស្សនកិច្ច ដើម្បីពិនិត្យវឌ្ឍនភាពនៃដំណើរការសាងសង់ព្រលានយន្តហោះថ្មីនេះ ដោយមានអារម្មណ៍ថា ភ្ញៀវអន្តរជាតិដែលមកទីនេះ នឹងមើលឃើញថា កម្ពុជា គឺជាប្រទេសទំនើបជាមួយថាមពល ដែលមានចក្ខុវិស័យ និងមានមហិច្ឆតាទៅថ្ងៃអនាគត។

ឯកឧត្តម ឯកអគ្គរាជទូត បានបង្ហាញជំនឿជឿជាក់ថា នៅពេលដែលភ្ញៀវអន្តរជាតិមកកាន់ព្រលានយន្តហោះថ្មីនេះ ពួកគេនឹងមើលឃើញសក្តានុពលដែលកម្ពុជាមាន ហើយរាល់ដងដែលស្ថានទូតមានភ្ញៀវមកពីចក្រភពអង់គ្លេស ពួកគាត់បានប្រាប់មកវិញថា កម្ពុជាល្អជាងអ្វីដែលពួកគាត់បានឃើញមុនមកដល់ទីនេះ ហើយច្បាស់ណាស់ ព្រលានយន្តថ្មីនេះ នឹងផ្លាស់ប្តូរឥរិយាបទរបស់ភ្ញៀវអន្តរជាតិចំពោះប្រទេសកម្ពុជា ប៉ុន្តែអ្វីដែលមានសារៈសំខាន់សម្រាប់ឯកឧត្តមធ្វើជាប្រជាជនកម្ពុជា គឺពិតជាមានមោទនភាពលើព្រលានយន្តហោះថ្មីនេះ ពីព្រោះទាំងអស់នៅក្នុងព្រលាននេះ គឺបានបង្ហាញនូវអ្វីដែលកម្ពុជាអាចធ្វើបាន។

ក្នុងដំណើរទស្សនកិច្ចរបស់គណៈប្រតិភូមកពីស្ថានទូតអង់គ្លេស និងគណៈប្រតិភូមកពីមន្ទីរពេទ្យ អ៊ិនធើឃែរ និងក្រុមហ៊ុនឯកជនផ្សេងៗទៀត ដើម្បីពិនិត្យវឌ្ឍនភាពនៃដំណើរការសាងសង់ព្រលានយន្តហោះអន្តរជាតិតេជោ អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានមានប្រសាសន៍ថា គិតមកដល់ពេលនេះ អាកាសយានដ្ឋានអន្តរជាតិតេជោ សម្រេចការសាងសង់ប្រមាណជាង ៩៦% នឹងគ្រោងបើកឱ្យដំណើរការ គឺនៅថ្ងៃទី៩ ខែកញ្ញា។ ហើយថ្ងៃសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២០ ខែតុលា ឆ្នាំ២០២៥ខាងមុខ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

អាកាសយានដ្ឋាននេះ សាងសង់ឡើងលើផ្ទៃដីជាង ២ ៦០០ហិចតា ជាព្រលានយន្តហោះលំដាប់ F4 ដែលអាចធ្វើឱ្យយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕

អត្ថបទ៖ ឈិត បូរ៉ាវី