អត្រាពន្ធលោហធាតុរបស់សហរដ្ឋអាមេរិក លើដែកថែប និងអាលុយមីញ៉ូម ដែលនាំចូលភាគច្រើន ត្រៀមចូលជាធរមាន ដោយកើនឡើងទ្វេដងនៅថ្ងៃពុធ (០៤ មិថុនា) នេះ ខណៈលោកប្រធានាធិបតី Donald Trump បន្តបញ្ឆេះសង្គ្រាមពាណិជ្ជកម្មពិភពលោក នៅថ្ងៃតែមួយដែលលោករំពឹងថា ដៃគូពាណិជ្ជកម្មនឹងដាក់ "សំណើផ្តល់ជូនដ៏ល្អបំផុត" របស់ពួកគេ ក្នុងកិច្ចប្រឹងប្រែងដើម្បីបញ្ចៀសអត្រាពន្ធនាំចូលខ្ពស់ៗលើទំនិញផ្សេងទៀតមិនឱ្យចូលជាធរមាននៅដើមខែកក្កដា ខាងមុខ។

លោក Trump កាលពីល្ងាចថ្ងៃអង្គារ បានចុះហត្ថលេខាលើក្រឹត្យធរមានចាប់ពីថ្ងៃពុធនេះ លើសេចក្តីប្រកាសដ៏គួរឱ្យភ្ញាក់ផ្អើលរបស់លោកកាលពីសប្តាហ៍មុន ជុំវិញការបន្ថែមពន្ធលើការនាំចូលដែកថែប និងអាលុយមីញ៉ូម ដែលមានតាំងពីខែមីនា ដល់អត្រាទ្វេដង ៥០% ពីតួលេខ ២៥% ពីមុន។ ពន្ធបង្កើនថ្មីនេះនឹងចូលជាធរមាននៅម៉ោង ១២:០១នាទីរំលងអាធ្រាត្រឈានចូលថ្ងៃទី០៤ មិថុនា (ពេលវេលានៅសហរដ្ឋអាមេរិក)។

ទីប្រឹក្សាសេដ្ឋកិច្ចសេតវិមាន លោក Kevin Hassett បាននិយាយក្នុងសន្និសីទឧស្សាហកម្មដែកថែបនៅទីក្រុងវ៉ាស៊ីនតោន កាលពីថ្ងៃអង្គារថា "អាមេរិកបានចាប់ផ្ដើមនៅអត្រា ២៥% ប៉ុន្តែបន្ទាប់ពីសិក្សាទិន្នន័យបន្ថែមទៀត ទើបដឹងថាត្រូវតែបង្កើនតួលេខនេះ ដូច្នេះហើយបានជាពន្ធ ៥០% នឹងចាប់ផ្តើមនៅថ្ងៃពុធ"។

កំណើននេះអនុវត្តចំពោះដៃគូពាណិជ្ជកម្មទាំងអស់ លើកលែងតែចក្រភពអង់គ្លេស ដែលជាប្រទេសតែមួយគត់ដែលបានឈានដល់កិច្ចព្រមព្រៀងពាណិជ្ជកម្មបឋមជាមួយអាមេរិក អំឡុងពេលផ្អាកពន្ធបដិការ ៩០ថ្ងៃ របស់លោក Trump។ អត្រាសម្រាប់ការនាំចូលដែកថែប និងអាលុយមីញ៉ូមពីចក្រភពអង់គ្លេស - ដែលមិនមែនជាអ្នកនាំចេញលោហៈធាតុកំពូលទៅកាន់សហរដ្ឋអាមេរិក - នឹងនៅតែមានកម្រិត ២៥% រហូតដល់យ៉ាងហោចណាស់ថ្ងៃទី០៩ ខែកក្កដា៕