អង្គភាពសេវាសន្តិសុខ SBU របស់ប្រទេសអ៊ុយក្រែន បាននិយាយកាលពីថ្ងៃអង្គារ ទី៣ ខែមិថុនា ថា ខ្លួនបានបំផ្លាញផ្លូវនិងស្ពានផ្លូវរថភ្លើងតភ្ជាប់ប្រទេសរុស្ស៊ី និងឧបទ្វីបគ្រីម៉េ ដោយប្រើប្រាស់គ្រឿងផ្ទុះនៅក្រោមទឹក។

នៅក្នុងសេចក្តីថ្លែងការណ៍មួយ អង្គភាពSBU បាននិយាយថា ខ្លួនបានប្រើប្រាស់គ្រឿងផ្ទុះទម្ងន់ ១.១០០ គីឡូក្រាម ដែលត្រូវបានបំផ្ទុះនៅពេលព្រឹកព្រលឹម និងបានបំផ្លាញបង្គោលស្ពានក្នុងទឹក ដែលជាផ្លូវផ្គត់ផ្គង់ដ៏សំខាន់សម្រាប់កងកម្លាំងរុស្ស៊ីនៅក្នុងប្រទេសអ៊ុយក្រែន នាពេលកន្លងទៅ។

សារព័ត៌មានផ្លូវការរបស់រុស្ស៊ី ដែលផ្តល់ការធ្វើបច្ចុប្បន្នភាពស្ថានភាពជាប្រចាំស្តីពីស្ពាននេះ បាននិយាយថា ប្រតិបត្តិការត្រូវបានផ្អាកប្រហែល៣ម៉ោង ចន្លោះពីម៉ោង៤ព្រឹកដល់ម៉ោង៧ព្រឹក ម៉ោងក្នុងស្រុក។

សារព័ត៌មាននេះពុំបានផ្តល់ហេតុផលសម្រាប់ការបិទបណ្តោះអាសន្ននោះទេ ប៉ុន្តែបាននិយាយថា ស្ពាននេះត្រូវបានបើកឡើងវិញ និងកំពុងដំណើរការជាធម្មតា។

អង្គភាព SBU បាននិយាយនៅក្នុងសេចក្តីថ្លែងការណ៍របស់ខ្លួនថា «កាលពីពេលមុន យើងបានវាយប្រហារស្ពាននៅតំបន់គ្រីម៉េពីរដងក្នុងឆ្នាំ២០២២ និងឆ្នាំ២០២៣។ ដូច្នេះពេលនេះ យើងបានបន្តការបំផ្ទុះនេះនៅក្រោមទឹក ហើយប្រតិបត្តិការត្រូវបានរៀបចំរយៈពេលជាច្រើនខែមកហើយ។

អ្នកសរសេរប្លុកយោធារបស់រុស្ស៊ីបាននិយាយថា ការវាយប្រហារនេះពុំបានជោគជ័យទេ ហើយបានសន្និដ្ឋានថា វាត្រូវបានអនុវត្តដោយយានដ្រូនរបស់អ៊ុយក្រែន។