សេតវិមានបាននិយាយថា លោក Donald Trump នឹងចូលរួមក្នុងកិច្ចប្រជុំកំពូលរបស់អង្គការសន្ធិសញ្ញាអាត្លង់ទិកខាងជើង(NATO) នៅទីក្រុងឡាអេ ប្រទេសហូឡង់ ខណៈប្រធានាធិបតីសហរដ្ឋអាមេរិក ព្យាយាមប្រមូលផ្តុំសមាជិកសម្ព័ន្ធមិត្ត ដើម្បីបង្កើនការចំណាយលើវិស័យការពារជាតិ។

អ្នកនាំពាក្យសេតវិមាន លោកស្រី Karoline Leavitt បាននិយាយទៅកាន់អ្នកសារព័ត៌មានកាលពីថ្ងៃអង្គារថា «ខ្ញុំអាចបញ្ជាក់បានថា លោក Trump នឹងទៅចូលរួមកិច្ចប្រជុំកំពូលរបស់សម្ព័ន្ធយោធាណាតូ»។ លោក Trump និយាយថា លោកចង់ឱ្យសមាជិកនៃសម្ព័ន្ធមិត្តចំណាយ ៥% នៃផលិតផលក្នុងស្រុកសរុប(GDP) លើផ្នែកយោធា ដែលចំនួននឹងកើនឡើងយ៉ាងច្រើនពីកម្រិតបច្ចុប្បន្នសម្រាប់ប្រទេសជាច្រើន។

សម្ព័ន្ធមិត្តនេះ នឹងពិភាក្សាអំពីគោលដៅមួយដែលនឹងធ្វើឱ្យប្រទេសនានាប្តេជ្ញាចំណាយ ៣,៥% នៃផលិតផលក្នុងស្រុកសរុបសម្រាប់វិស័យការពារជាតិស្នូល និង១,៥% ផ្សេងទៀតលើវិស័យនានារួមទាំងហេដ្ឋារចនាសម្ព័ន្ធ ការការពារតាមអ៊ីនធឺណិត និងការត្រៀមលក្ខណៈស៊ីវិល។

សម្ព័ន្ធយោធាណាតូ នឹងជំរុញប្រទេសអឺរ៉ុបឱ្យបង្កើនការការពារដែនអាកាស៥ដង នៅក្នុងកិច្ចប្រជុំកំពូលនៅថ្ងៃទី២៤-២៥ ខែមិថុនា ដែលកើតឡើងភ្លាមៗបន្ទាប់ពីមេដឹកនាំក្រុមប្រទេសG7 ត្រូវបានគេរំពឹងថានឹងជួបគ្នានៅក្នុងប្រទេសកាណាដាដោយបង្កើតកិច្ចប្រជុំកម្រិតខ្ពស់មួយ នៅកន្លែងដែលសម្ព័ន្ធមិត្តត្រូវបានគេរំពឹងថានឹងពិភាក្សាអំពីវឌ្ឍនភាពលើកិច្ចព្រមព្រៀងសន្តិភាពរវាងអ៊ុយក្រែននិងរុស្ស៊ី។

លោកស្រី Leavitt បាននិយាយថា លោក Trump «នៅតែមានភាពវិជ្ជមាន» អំពីស្ថានភាពនៃកិច្ចពិភាក្សារវាងទីក្រុងមូស្គូ និងទីក្រុងគីវ។ «លោកប្រធានាធិបតី មិនចង់មើលឃើញសង្រ្គាមនេះ អូសបន្លាយពេលទៀតទេ លោកចង់ឱ្យការប្រយុទ្ធគ្នាត្រូវបញ្ចប់ លោកចង់ឱ្យការសម្លាប់មនុស្សត្រូវបញ្ឈប់ ហើយលោកចង់ឱ្យបញ្ហានេះត្រូវបានដោះស្រាយនៅតុចរចា។