អភិបាលក្រុង Newark របស់រដ្ឋ New Jersey ដែលត្រូវបានចាប់ខ្លួនដោយភ្នាក់ងារអន្តោប្រវេសន៍របស់សហរដ្ឋអាមេរិក នៅមជ្ឈមណ្ឌលឃុំឃាំងមួយកាលពីខែមុន បានប្តឹងក្រុមមន្ត្រីអនុវត្តច្បាប់ ២នាក់កាលពីថ្ងៃអង្គារ (០៣ មិថុនា) ដោយចោទប្រកាន់ថា ការចាប់ខ្លួននេះគឺជាផ្នែកមួយនៃហេតុផលនយោបាយដោយរដ្ឋបាលរបស់លោកប្រធានាធិបតី Donald Trump។

លោកអភិបាលក្រុង Ras Baraka សមាជីកបក្សប្រជាធិបតេយ្យ ដែលឥឡូវនេះកំពុងឈរឈ្មោះជាអភិបាលរដ្ឋ New Jersey បានចោទប្រកាន់នៅក្នុងពាក្យបណ្តឹងនោះថា លោកត្រូវបានចាប់ខ្លួនដោយខុសឆ្គងពីបទលួចចូលទៅទីតាំងនោះដោយគ្មានការអនុញ្ញាត ដែលជាបទចោទគ្មានមូលហេតុត្រឹមត្រូវ និងប្រកបដោយបំណងព្យាបាទ។

បណ្ដឹងនោះបានទាក់ទាញការចាប់អារម្មណ៍យ៉ាងទូលំទូលាយស្របពេលមានការប៉ះទង្គិចគ្នាកាន់តែខ្លាំងក្លាឡើងរវាងរដ្ឋបាលលោក Trump និងសមាជិកគណបក្សប្រជាធិបតេយ្យ ជុំវិញវិធីសាស្ត្រដ៏រឹងរូសរបស់លោក Trump ចំពោះអន្តោប្រវេសន៍។

គួរឱ្យដឹងថា លោក Baraka ត្រូវបានចាប់ខ្លួន បន្ទាប់ពីអាជ្ញាធរអាមេរិក និយាយថាលោកដិសេធមិនចាកចេញពីអគារឈ្មោះ Delaney Hall ជាទីដែលតំណាងរាស្រ្តអាមេរិក LaMonica McIver និងសមាជិកសភាប្រជាធិបតេយ្យពីរនាក់ផ្សេងទៀតមកពីរដ្ឋ New Jersey កំពុងធ្វើទស្សនកិច្ចត្រួតពិនិត្យ៕