ក្រុមមន្ត្រី និងអ្នកវិភាគបាននិយាយថា កងកម្លាំងរុស្ស៊ី បានពង្រីកជួរមុខ និងការវាយរុលរបស់ពួកគេនៅក្នុងតំបន់ Sumy ភាគខាងជើងរបស់ប្រទេសអ៊ុយក្រែន ខណៈទីក្រុងមូស្គូនិយាយថា ខ្លួនបានដណ្តើមយកភូមិមួយផ្សេងទៀតកាលពីថ្ងៃអង្គារ (០៣ មិថុនា) ដោយនាំឱ្យទីក្រុង Sumy របស់តំបន់នេះ កាន់តែខិតទៅជិតរយៈចម្ងាយនៃសមរភូមិយានដ្រូន។

ការវាយរុលឆ្ពោះទៅកាន់ទីក្រុង Sumy ដែលជាមជ្ឈមណ្ឌលរដ្ឋបាលនៃតំបន់ Sumy បានកើតឡើងនៅពេលទីក្រុងគីវ បានបង្ហាញសមត្ថភាពរបស់ខ្លួនក្នុងការបន្តការប្រយុទ្ធ ដោយបើកការវាយប្រហារជាបន្តបន្ទាប់ក្នុងប៉ុន្មានថ្ងៃថ្មីៗ និងបានវាយលុកទៅលើយន្តហោះទម្លាក់គ្រាប់បែកយុទ្ធសាស្ត្ររបស់រុស្ស៊ី និងស្ពាននៅតំបន់គ្រីម៉េ។

កាលពីថ្ងៃអង្គារ ក្រសួងការពារជាតិរុស្ស៊ី និយាយថា កងកម្លាំងរបស់ខ្លួនបានកាន់កាប់ភូមិ Andriivka បន្ទាប់ពីដណ្តើមបានភូមិជាច្រើនផ្សេងទៀតក្នុងប៉ុន្មានថ្ងៃថ្មីៗ។ ទីក្រុងគីវនិយាយថា ការវាយប្រហារដោយកាំភ្លើងធំរបស់រុស្ស៊ី លើទីក្រុង Sumy បានសម្លាប់ និងបង្ករបួសដល់មនុស្សជាច្រើននាក់។

ប្រមុខរដ្ឋបាលយោធានៃតំបន់ Sumy ដែលស្ថិតនៅភាគខាងជើងទីក្រុង Kharkiv ធំទីពីររបស់អ៊ុយក្រែន បានបើកកិច្ចប្រជុំកាលពីថ្ងៃអង្គារ ដើម្បីពិភាក្សាអំពីយុទ្ធសាស្ត្រការពារក្នុងតំបន់។ កាលពីថ្ងៃចន្ទ លោក Ivan Shevtsov អ្នកនាំពាក្យកងពលតូចអ៊ុយក្រែនប្រយុទ្ធនៅក្រុង Sumy បាននិយាយថា ប្រសិនបើការវាយរុលរបស់រុស្ស៊ី ដណ្តើមបានទីប្រជុំជន Yunakivka នោះទីក្រុង Sumy នឹងស្ថិតនៅក្រោមការគំរាមកំហែងដោយផ្ទាល់៕