ទាហានរាប់រយនាក់មកពីប្រទេសកូសូវ៉ូ សហរដ្ឋអាមេរិក អាល់បានី ក្រូអាត និងសម្ព័ន្ធមិត្តអង្គការណាតូផ្សេងទៀត បានចូលរួមក្នុងសមយុទ្ធយោធានៅភាគខាងលិចប្រទេសកូសូវ៉ូ កាលពីថ្ងៃអង្គារ ទី៣ មិថុនា។ Defender Europe គឺជាសមយុទ្ធយោធាប្រចាំឆ្នាំធំបំផុតរបស់សហរដ្ឋអាមេរិកនៅអឺរ៉ុប។

ក្នុងអំឡុងពេលសមយុទ្ធ បុគ្គលិកនិងយុទ្ធោបករណ៍ត្រូវបានដាក់ពង្រាយនៅទូទាំងបណ្តាប្រទេសអឺរ៉ុបជាច្រើន ដើម្បីបង្ហាញពីសមត្ថភាពបង្កគ្រោះថ្នាក់ធំធេង និងអន្តរប្រតិបត្តិការជាមួយដៃគូ។

ទាហានប្រហែល ២៥.០០០នាក់មកពីសម្ព័ន្ធយោធាណាតូ និងប្រទេសសម្ព័ន្ធមិត្ត ត្រូវបានដាក់ពង្រាយនៅក្នុងបណ្តាប្រទេសអឺរ៉ុបចំនួន១៨ប្រទេស រួមទាំងទាហានអាមេរិកជាង៥.០០០នាក់ ដែលមានមូលដ្ឋានចាប់ពីប្រទេសន័រវេសទៅដល់ប្រទេសក្រិក។

នៅថ្ងៃចុងក្រោយនៃសមយុទ្ធ នាយករដ្ឋមន្ត្រីប្រទេសកូសូវ៉ូ លោក Albin Kurti បាននិយាយថា ប្រទេសរបស់លោកបានត្រៀមខ្លួនរួចរាល់ដើម្បីចូលជាសមាជិកសម្ព័ន្ធយោធាណាតូ។

ប៉ុន្តែបំណងប្រាថ្នារបស់ប្រទេសកូសូវ៉ូក្នុងការចូលរួមក្នុងសម្ព័ន្ធមិត្តនេះ ប្រឈមនឹងបញ្ហាជាច្រើន ខណៈសមាជិកណាតូចំនួនបួនប្រទេស មិនទទួលស្គាល់ប្រទេសនេះថាជាប្រទេសឯករាជ្យ។ ចាប់តាំងពីការបញ្ចប់សង្គ្រាមរវាងកងកម្លាំងរបស់ប្រទេសស៊ែរប៊ី និងអាល់បានីកូសូវ៉ូ ក្នុងឆ្នាំ១៩៩៩ អង្គការណាតូ បានរក្សាបេសកកម្មយោធារបស់ខ្លួនក្នុងគោលបំណងការពារសន្តិភាពដ៏ផុយស្រួយ របស់តំបន់នេះ។