ស្ថានទូតរុស្ស៊ី ប្រចាំនៅទីក្រុងឡុងដ្រ៍ កាលពីថ្ងៃអង្គារ (ទី៣ ខែមិថុនា) បានបញ្ជាក់ថា ទីក្រុងមូស្គូគ្មានចេតនាណាមួយវាយប្រហារចក្រភពអង់គ្លេសនោះឡើយ ដោយបដិសេធរាល់ការចោទប្រកាន់របស់រដ្ឋាភិបាលអង់គ្លេស ពាក់ព័ន្ធនឹងការលុកលុយឈ្លានពាន និងការវាយប្រហារតាមប្រព័ន្ធអ៊ីនធឺណិតរាល់ថ្ងៃ។

កាលពីថ្ងៃចន្ទ (ទី២ ខែមិថុនា) អង់គ្លេសបានប្រាប់ឲ្យដឹងថា ខ្លួននឹងធ្វើការផ្លាស់ប្តូរយ៉ាងធំនូវវិធីសាស្រ្តការពារជាតិរបស់ខ្លួន ដើម្បីដោះស្រាយជាមួយការគំរាមកំហែងថ្មីៗ ក្នុងនោះរួមទាំងពីរុស្ស៊ីផងដែរ បន្ទាប់ពីបានយល់ស្របជាមួយនឹងលទ្ធផលឯករាជ្យនៃការពិនិត្យឡើងវិញនូវវិស័យការពារជាតិជាយុទ្ធសាស្ត្រ។

បន្ទាប់ពីបានបង្ហាញពីការរុះរើផ្នែកការពារជាតិ កាលពីថ្ងៃចន្ទ រដ្ឋមន្ត្រីការពារជាតិ លោក John Healey បាននិយាយថា អឺរ៉ុបកំពុងប្រឈមមុខនឹងសង្រ្គាម ការលុកលុយឈ្លានពានរបស់រុស្ស៊ី ហានិភ័យនុយក្លេអ៊ែរថ្មី និងការវាយប្រហារតាមប្រព័ន្ធអ៊ីនធឺណិតរាល់ថ្ងៃ។

ស្ថានទូតរុស្ស៊ីបានចេញសេចក្តីថ្លែងការណ៍មួយកាលពីថ្ងៃអង្គារដោយរិះគន់នូវអ្វីដែលខ្លួនបានពណ៌នាថា ជា «ដំណាក់កាលថ្មីនៃវោហាសាស្ត្រប្រឆាំងរុស្ស៊ី»។ សេចក្តីថ្លែងការណ៍បានបញ្ជាក់បន្ថែមថា៖ «ប្រទេសរុស្ស៊ីមិនគំរាមកំហែងដល់ចក្រភពអង់គ្លេស និងប្រជាជនរបស់ប្រទេសនេះឡើយ។ យើងគ្មានចេតនាលុកលុយឈ្លានពាន ហើយក៏គ្មានគម្រោងវាយប្រហារអង់គ្លេសដែរ។ យើងមិនចាប់អារម្មណ៍ ក្នុងការធ្វើដូច្នេះទេ ហើយក៏មិនត្រូវការធ្វើដូច្នេះដែរ»។

គួរបញ្ជាក់ថា ទំនាក់ទំនង រវាងរុស្ស៊ី និងអង់គ្លេស ស្ថិតក្នុងកម្រិតទាបបំផុត ចាប់តាំងពីសម័យសង្គ្រាមត្រជាក់។ វាកាន់តែយ៉ាប់យ៉ឺនបន្ថែមទៀត បន្ទាប់ពីមានការលុកលុយពេញបន្ទុករបស់រុស្ស៊ីលើអ៊ុយក្រែន ក្នុងខែកុម្ភៈ ឆ្នាំ២០២២ ហើយចក្រភពអង់គ្លេស និងសមាជិកអង្គការណាតូផ្សេងទៀត បានផ្តល់ជំនួយផ្នែកយោធា និងជំនួយផ្សេងៗទៀតយ៉ាងច្រើនសន្ធឹកសន្ធាប់ដល់ទីក្រុងគីវ៕