​បាល់ទាត់៖ ខ្សែប្រយុទ្ធ​សញ្ជាតិ​កូ​ឡុំ​ប៊ី Andres Nieto បាន​ក្លាយជា​កីឡាករ​បរទេស​ទី​២ ត្រូវបាន​ក្លិប​បាល់ទាត់​ភ្នំពេញ​ក្រោ​នបានប្រកាស​បន្ដ​កុងត្រា ១​ឆ្នាំ​ទៀតបន្ទាប់ពី​ខ្សែបម្រើ​ជប៉ុន Yudia Ogawa បន្ទាប់ពី​ពួកគេបានរួម​ចំណែក​យ៉ាងសំខាន់​ជួយ​ក្លិប​ គ្រង​ជើងឯក​លី​គ​កំពូល​កម្ពុជាលើក​ទី​៧ ក្នុង​ប្រវត្តិសាស្ដ្រ​របស់​ក្លិប។​

Andres Nieto បាន​ផ្ដើម​អាជីព​បាល់ទាត់​នៅ​កម្ពុជាជាមួយ​ក្រុម​សិង្ហ​ក្រហមកាលពី​ឆ្នាំ​២០២០ ហើយ​នៅ​ឆ្នាំ​២០២១ ខ្សែប្រយុទ្ធ​រូបនេះបាន​ដើរតួ​យ៉ាងសំខាន់ក្នុង​ការជួយ​ក្រុម​ប្រយុទ្ធ​លើ​សមរភូមិ​វាលស្មៅ រហូត​សម្រេច​ក្ដី​ស្រ​ម៉ៃ​លើក​ពាន​លី​គ​កំពូល​កម្ពុជា​លើកដំបូង ក្នុង​អាជីព​របស់ខ្លួនជាមួយ​ភ្នំពេញ​ក្រោ​ន។​ ​មកទល់ពេលនេះ ភ្នំពេញ​ក្រោ​នបាន​បន្ដ​កុងត្រា​កីឡាករ​បរទេស ២​រូប​ហើយដើម្បី​ត្រៀម​រដូវ​កាល​ថ្មី ក៏ដូចជា​ត្រៀម​ការប្រកួត​ពានរង្វាន់ AFC Cup 2020 គឺ​កីឡាករ Andres Nieto និង Yudia Ogawa។ រីឯ​កីឡាករ​បរទេស ២​រូប​ទៀតរួមមាន​ខ្សែប្រយុទ្ធ​អ៊ុយ​ក្រែ​ន Valeriy Hyrshyn និង​កីឡាករ​ជប៉ុន Takaki Ose ក្លិប​នៅ​មិនទាន់​ប្រកាស​បន្ដ​កុងត្រា ឬ​អត់​នោះទេ បន្ទាប់ពី​ក្រុមជើងឯក​លី​គ ៧​សម័យនេះបាន​ចែកផ្លូវ​ជាមួយ​ខ្សែប្រយុទ្ធ​ប្រេ​ស៊ី​ល Matheus S.Silva មុនគេក្រោយ​ចប់​រដូវ​កាលកាលពី​ថ្មីៗ៕

​អត្ថបទ៖ លី ឈុន​ឡា