អឺរ៉ុប៖ មន្ត្រីជាន់ខ្ពស់របស់អង្គការសុខភាពពិភពលោកប្រចាំទ្វីបអឺរ៉ុបបានព្រមានថា ការហក់ឡើងនៃករណីឆ្លងវីរុសបម្លែងខ្លួន Omicron នឹងជំរុញឱ្យប្រព័ន្ធសុខាភិបាលអឺរ៉ុបឆ្ពោះទៅរកមាត់ជ្រោះមហន្តរាយ។ លោក Hans Kluge បាននិយាយថា "ព្យុះមួយទៀត" កំពុងមកដល់ ហើយរដ្ឋាភិបាលគួរតែត្រៀមចំពោះករណីឆ្លង ដែលកំពុងកើនឡើងគួរឱ្យកត់សម្គាល់។
ការព្រមានរបស់លោកបានកើតឡើង ខណៈប្រទេសមួយចំនួនបានដាក់ចេញវិធានការរឹតត្បិត គម្លាតសវុត្ថិភាពសង្គមឡើងវិញ។ ប្រទេសអាល្លឺម៉ង់បានប្រកាសវិធានការថ្មីក្រោយបុណ្យណូអែល រួមទាំងការកំណត់លើពិធីជប់លៀងនានា។ ទន្ទឹមនឹងនេះ ប្រទេសព័រទុយហ្គាល់បានបញ្ជាឱ្យបិទបារ និងក្លឹបរាត្រីចាប់ពីថ្ងៃទី២៦ ខែធ្នូតទៅ។ នាយករដ្ឋមន្ត្រីអង់គ្លេសលោក Boris Johnson បានច្រានចោលការរឹតត្បិតថ្មីណាមួយសម្រាប់អង់គ្លេសមុនថ្ងៃបុណ្យណូអែល ប៉ុន្តែដែនដីស្កុតឡិន វេលស៍ និងអៀរឡង់ខាងជើងបានប្រកាសពីការទប់ស្កាត់លើការបង្កើនសកម្មភាពសង្គមចម្រុះគ្នា។ វីរុសបម្លែងខ្លួនថ្មី Omicron ត្រូវបានគេរកឃើញដំបូងនៅអាហ្វ្រិកខាងត្បូងកាលពីខែមុន ប៉ុន្តែឥឡូវបានរីករាលដាលជុំវិញពិភពលោក។
អង្គការនេះបាននិយាយថា វីរុសនេះត្រូវបានគេរកឃើញនៅក្នុងប្រទេសយ៉ាងហោចណាស់ ៣៨ ក្នុងចំណោម ៥៣ប្រទេសនៅក្នុងតំបន់អឺរ៉ុបរបស់អង្គការសុខភាពពិភពលោកដែលរួមមានរុស្ស៊ី និងទួរគី ហើយវីរុសមានឥទ្ធិពលឆ្លងខ្លាំងនៅក្នុងប្រទេសមួយចំនួន។ អង្គការសុខភាពពិភពលោកបានអំពាវនាវឱ្យលុបចោលការជួបជុំថ្ងៃសម្រាកមួយចំនួន ខណៈវីរុស Covid-19 បម្លែងខ្លួនថ្មី Omicron រីករាលដាលយ៉ាងឆាប់រហ័សនៅជុំវិញពិភពលោក ដោយលើកឡើងថា លុបចោលព្រឹត្តិការណ៍នេះប្រសើរជាងលុបចោលជីវិត។ ការឆ្លងខ្ពស់នៃវីរុសបម្លែងខ្លួនថ្មីឥឡូវនេះត្រូវបានគេរកឃើញនៅក្នុងប្រទេសជាង ១០០ ហើយបានបង្ខំឱ្យរដ្ឋាភិបាលមួយចំនួនដាក់ចេញវិធានការកាន់តែរឹតរ៉ឹងជាងមុន ទប់ស្កាត់ការឆ្លងរាលដាលក្នុងអំឡុងពេលពិធីបុណ្យណូអែល៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
