ក្រសួងមហាផ្ទៃប៉ាគីស្ថាននិយាយប្រាប់ទីភ្នាក់ងារព័ត៌មាន AFPថា ពលរដ្ឋអាហ្វហ្គានីស្ថានជិត ២០ម៉ឺននាក់ បានចាកចេញពីប៉ាគីស្ថាន ចាប់តាំងពីរដ្ឋាភិបាលអ៊ីស្លាម៉ាដា ចាប់ផ្តើមឡើងវិញកិច្ចខិតខំនិរទេសខ្លួនពួកគេកាលពីខែមេសា ។ 

ប៉ាគីស្ថាន បានចុះយុទ្ធនាការបណ្តេញពលរដ្ឋអាហ្វហ្គានីស្ថានជាង ៨០ម៉ឺននាក់ ពេលដែលការអនុញ្ញាតឲ្យស្នាក់នៅរបស់ពួកគេ ត្រូវបានលុបចោល រួមទាំងអ្នកដែលបានកើតនៅក្នុងប្រទេសប៉ាគីស្ថាន ឬរស់នៅទីនោះអស់រយៈពេលរាប់ទសវត្សរ៍ ។

យោងតាមការអះអាងរបស់ក្រសួងមហាផ្ទៃប៉ាគីស្ថាន បានឲ្យដឹងថា ពលរដ្ឋអាហ្វហ្គានីស្ថានជាង ១៣៥.០០០នាក់ បានចាកចេញពីប៉ាគីស្ថានក្នុងខែមេសា ខណៈចំនួនចាកចេញបានធ្លាក់ចុះមកនៅត្រឹម ៦៧.០០០នាក់ នៅខែឧសភា និងជាង ៣ពាន់នាក់ ត្រូវបានបញ្ជូនត្រឡប់ទៅវិញនៅរយៈពេល ២ថ្ងៃដំបូងក្នុងខែមិថុនា ។

ពលរដ្ឋអាហ្វហ្គានីស្ថានរាប់លាននាក់ បានសម្រុកធ្វើដំណើរមកកាន់ប្រទេសប៉ាគីស្ថានក្នុងរយៈពេលជាច្រើនទសវត្សរ៍កន្លងមកនេះ ដើម្បីរត់ភៀសខ្លួនចេញពីសង្រ្គាម ក៏ដូចជាមនុស្សរាប់សែននាក់ បានរត់ភៀសខ្លួន ក្រោយការវិលត្រឡប់ទៅកាន់អំណាចវិញរបស់ក្រុមតាលីបង់កាលពីឆ្នាំ ២០២១ ។

យុទ្ធនាការបណ្តេញពួកគេ បានចាប់ផ្តើមនៅឆ្នាំ ២០២៣ បង្ខំឲ្យមនុស្សរាប់ម៉ឺននាក់ ធ្វើដំណើរឆ្លងកាត់ព្រំដែនត្រឹមរយៈពេលប៉ុន្មានថ្ងៃប៉ុណ្ណោះ ដោយសារភ័យខ្លាចពីការចាប់ខ្លួន ឬបៀតបៀន ។ ជាសរុបពលរដ្ឋអាហ្វហ្គានីស្ថានជាង ១លាននាក់ បានចាកចេញពីប្រទេសប៉ាគីស្ថាន ៕