តេក្វាន់ដូ៖ ការប្រកួតកីឡាតេក្វាន់ដូ WT ជ្រើសរើសជើងឯកថ្នាក់ជាតិឆ្នាំ២០២១ បានបញ្ចប់ហើយដោយក្លិបកីឡាតេក្វាន់ដូ WT ក្រសួងមហាផ្ទៃបានរក្សាភាពខ្លាំង ជាមួយការដណ្ដើមបានមេដាយច្រើនជាងគេសរុប ៥គ្រឿងក្រោយបញ្ចប់ការប្រកួតកាលពីថ្ងៃទី២១ ខែធ្នូម្សិលមិញ។
ជើងឯកតេក្វាន់ដូ WT ថ្នាក់ជាតិឆ្នាំនេះមានកីឡាករ-កីឡាការិនី ៩៦នាក់មកពី ២៧សមាគម/ក្លិបទូទាំងប្រទេសចូលរួមដោយធ្វើការប្រកួតប្រជែងលើ ១៧វិញ្ញាសា។ ជាលទ្ធផលក្រុមកីឡាករ-កីឡាការិនីក្លិបក្រសួងមហាផ្ទៃ ដណ្ដើមបានមេដាយច្រើនជាងគេរួមមានមេដាយមាស៤ និងសំរឹទ្ធ១។ ចំណែកក្លិបពិភពថ្មីឈរលេខរៀងទី២ ដណ្ដើមបានមេដាយមាស២ ប្រាក់២ និងសំរឹទ្ធ១ និងក្លិបសាមគ្គីឈរលេខរៀងទី៣ ឈ្នះមេដាយមាស២ និងប្រាក់១ ខណៈ ៧ក្លិបផ្សេងទៀតក៏ដណ្តើមបានមេដាយមាស ១គ្រឿងដូចគ្នាផងដែរ។ លោក គង់ សក្ខិដា អគ្គលេខាធិការរងសហព័ន្ធបានបញ្ជាក់ថា តាមរយៈការប្រកួតបច្ចេកទេសកម្រិតខ្ពស់ប្រចាំឆ្នាំនេះ ជាការផ្តល់ឱកាសដល់កីឡាករ-កីឡាការិនីទាំងអស់បានបញ្ចេញនូវសមត្ថភាព និងទេពកោសល្យដើម្បីដណ្តើមជ័យលាភីរៀងៗខ្លួន ក្នុងគោលដៅឆ្ពោះទទួលធ្វើម្ចាស់ផ្ទះការប្រកួតកីឡាស៊ីហ្គេមនៅកម្ពុជានាឆ្នាំ២០២៣ ខាងមុខ។
ឆ្លៀតឱកាសនោះ លោក ម៉ៅ ស្រេង អនុប្រធានសហព័ន្ធបានវាយតម្លៃខ្ពស់ និងកោតសរសើរ ចំពោះគណៈកម្មាធិការប្រតិបត្តិសហព័ន្ធ ដែលបានរៀបចំការប្រកួតនេះ ប្រកបដោយភាពជោគជ័យ និងប្រព្រឹត្តទៅដោយរលូន ដោយរក្សាបាននូវសុវត្ថិភាព-សុខភាពដល់អ្នកចូលរួម ជាពិសេសគឺការប្រកួតគោរពនូវបទបញ្ជាប្រកួតបានល្អប្រសើរ។ អនុប្រធានសហព័ន្ធដដែលបានចាត់ទុកការប្រកួតនេះ គឺជាការវាស់ស្ទង់បច្ចេកទេស និងសមត្ថភាពរបស់ក្រុមកីឡាករ-កីឡាការិនីទាំងអស់ត្រៀមជ្រើសរើសចូលក្នុងក្រុមជម្រើសជាតិ ត្រៀមចូលរួមការប្រកួតកីឡាអន្ដរជាតិនានា ពិសេសដំណើរឆ្ពោះទៅព្រឹត្តិការណ៍ជាប្រវត្តិសាស្ដ្រលើកដំបូង នៅកម្ពុជានាឆ្នាំ២០២៣ តែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
