រដ្ឋមន្ត្រីក្រសួងមហាផ្ទៃ លោក Alexander Dobrindt នៅថ្ងៃពុធ (ទី៤ ខែមិថុនា) បាននិយាយថា រដ្ឋាភិបាលអាល្លឺម៉ង់ គ្រោងនឹងធ្វើឲ្យកាន់តែងាយស្រួលជាងមុន សម្រាប់ការប្រកាសប្រទេសដើមមួយចំនួនមានសុវត្ថិភាព ក្រោមការជំរុញ ដើម្បីកាត់បន្ថយចំនួនអ្នកស្វែងរកសិទ្ធិជ្រកកោន។

លោក Dobrindt បានប្រាប់អ្នកសារព័ត៌មានថា នៅក្រោមផែនការដែលទទួលបានការព្រមព្រៀងពីបណ្ដារដ្ឋមន្ត្រី នៅក្នុងជួររដ្ឋាភិបាលរបស់អធិការបតី លោក Friedrich Merz នៅថ្ងៃពុធនេះ ការអនុម័តពីសភាជាន់ខ្ពស់របស់អាល្លឺម៉ង់ នឹងលែងតម្រូវឲ្យមានការសម្រេច ដែលថា តើមានការធ្វើទុក្ខបុកម្នេញនៅក្នុងប្រទេសមួយដែលនឹងផ្ដល់នូវលក្ខណៈសម្បត្តិគ្រប់គ្រាន់ដល់ប្រជាជនពីទីនោះសុំសិទ្ធិជ្រកកោនដែរ ឬទេ។

សភាជាន់ខ្ពស់ Bundesrat តំណាងឲ្យរដ្ឋសហព័ន្ធចំនួន ១៦ របស់ប្រទេសអាល្លឺម៉ង់។ ការឆ្លងកាត់សភា Bundesrat នឹងពន្លឿនដល់ដំណើរការនេះ។

លោក Merz បានឈ្នះការបោះឆ្នោតជាតិ ក្នុងខែកុម្ភៈ ដោយសន្យាថា នឹងបង្រ្កាបការធ្វើអន្តោប្រវេសន៍ និងរារាំងអ្នកស្វែងរកសិទ្ធិជ្រកកោន នៅតាមព្រំដែន ប៉ុន្តែជំហរដ៏តឹងតែងនេះ បានជួបប្រទះនឹងឧបសគ្គផ្លូវច្បាប់ ក្នុងសប្តាហ៍នេះ ហើយបាននាំឲ្យមានការរិះគន់ពីគណបក្សប្រឆាំង៕