នគរបាលនៅរដ្ឋធានី Islamabad ប្រទេសប៉ាគីស្ថាន បានចាប់ខ្លួនបុរសម្នាក់ដែលរងការចោទប្រកាន់ថា បានធ្វើឃាតតារាបណ្តាញព័ត៌មានសង្គម TikTok ដ៏មានឥទ្ធិពលវ័យ ១៧ឆ្នាំមួយរូប គឺនាង Sana Yousaf ។

នាង Yousaf ដែលមានអ្នកដើរតាមរាប់ម៉ឺននាក់នៅលើបណ្តាញព័ត៌មានសង្គម TikTok និង Instagram នោះ ត្រូវបានខ្មាន់កាំភ្លើងបាញ់សម្លាប់នៅផ្ទះរបស់នាងកាលពីថ្ងៃចន្ទ ។

សារព័ត៌មានក្នុងស្រុករាយការណ៍ថា នាង Yousaf ត្រូវបានបាញ់សម្លាប់នៅផ្ទះរបស់នាង ស្ថិតក្នុងទីក្រុង Islamabad កាលពីវេលាម៉ោង ៥ល្ងាច ម៉ោងក្នុងស្រុកថ្ងៃចន្ទ ។

សេចក្តីរាយការណ៍បន្តថា នាង Yousaf ត្រូវបានឃាតករបាញ់ ២គ្រាប់ត្រូវចំដើមទ្រូងរបស់នាង ហើយត្រូវបានបញ្ជូនទៅកាន់មន្ទីរពេទ្យ ប៉ុន្តែនាងបានស្លាប់ ដោយសាររបួសរបស់នាង ។

សូមបញ្ជាក់ថា នាង Yousaf មានដើមកំណើតមកពីទីក្រុង Chitral ដែលមានចម្ងាយប្រហែល ៤០០គ.មភាគខាងជើងទីក្រុង Islamabad ៕