មន្ត្រីជាន់ខ្ពស់គណបក្សមួយរូប បាននិយាយថា គណបក្សកាន់អំណាចរបស់ប្រទេសហុងគ្រី បានពន្យារពេលការជជែកដេញដោល ក្នុងសភា និងការបោះឆ្នោតដែលនឹងធ្វើឡើងនៅពាក់កណ្តាលខែមិថុនា ជុំវិញតម្លាភាពដែលគ្រប់គ្រងក្រុមទទួលមូលនិធិពីបរទេស បន្ទាប់ពីមានការតវ៉ាថា វាហាក់ដូចជាមានគោលបំណងរារាំងអ្នកមានគំនិតផ្ទុយផ្នែកនយោបាយ។

គួរបញ្ជាក់ថា គណបក្ស Fidesz របស់លោកនាយករដ្ឋមន្ត្រី Viktor Orban បានដាក់សេចក្ដីស្នើច្បាប់ទៅសភា កាលពីថ្ងៃទី១៤ ខែឧសភា ដែលនឹងព្រាងបញ្ជីអង្គការទទួលបានមូលនិធិពីបរទេស និងដាក់កម្រិត ឬសូម្បីតែបិទស្ថាប័ន ប្រសិនបើត្រូវបានចាត់ទុកថា គំរាមកំហែងដល់អធិបតេយ្យភាព និងវប្បធម៌របស់ប្រទេសហុងគ្រី។

សេចក្ដីស្នើច្បាប់នេះត្រូវបានសារព័ត៌មានហុងគ្រី វិទ្យាស្ថានស្រាវជ្រាវ និងក្រុមការពារសិទ្ធិជនស៊ីវិលរិះគន់យ៉ាងខ្លាំង។ ការតវ៉ាតាមដងផ្លូវបានកើតឡើង ហើយអ្នកសារព័ត៌មានជាច្រើនមកពីស្ថាប័នព័ត៌មានអឺរ៉ុបឈានមុខគេ បានចុះហត្ថលេខាលើញត្តិកាលពីខែមុន ដោយអំពាវនាវឲ្យរដ្ឋាភិបាលជាតិនិយមរបស់លោក Orban លុបចោលច្បាប់នេះ។

នៅក្នុងលិខិតមួយដែលបានចេញផ្សាយ នៅថ្ងៃពុធ ក្រុមប្រឹក្សានៃស្នងការអឺរ៉ុបទទួលបន្ទុកសិទ្ធិមនុស្ស បានអំពាវនាវឲ្យសមាជិកសភាហុងគ្រីបដិសេធ ឬកែប្រែច្បាប់នេះ ដោយលើកឡើងពីក្ដីបារម្ភ អំពីការរំលោភសិទ្ធិមនុស្ស។

ប្រធានគណបក្ស Fidesz លោក Máté Kocsis បានប្រាប់គេហទំព័រសារព័ត៌មាន index.hu ថា៖ «ក្រុមសមាជិកសភា (បក្ស Fidesz) បានយល់ឃើញរួមគ្នាថា ឧបករណ៍ច្បាប់ត្រូវតែប្រើ ដើម្បីការពារអធិបតេយ្យភាព។ តែទោះបីជាយ៉ាងណាក្ដី មានការជជែកវែកញែកអំពីអ្វីដែលឧបករណ៍ទាំងនោះគួរតែជា»។

លោកបានបញ្ជាក់បន្ថែមថា សំណើជាច្រើនត្រូវបានដាក់ស្នើឡើងទាក់ទងនឹងច្បាប់នេះ ក្នុងប៉ុន្មានសប្តាហ៍ថ្មីៗនេះ ដែលការជជែកដេញដោល ចាំបាច់ត្រូវពន្យារពេលរហូតដល់សម័យប្រជុំសភារដូវស្លឹកឈើជ្រុះ៕