ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃពុធថា លោកបានសន្ទនាតាមទូរស័ព្ទរយៈពេល៧៥នាទីជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ដើម្បីពិភាក្សាអំពីជម្លោះដែលនៅតែបន្តក្នុងប្រទេសអ៊ុយក្រែន និងភាពតានតឹងក្នុងតំបន់ជាមួយប្រទេសអ៊ីរ៉ង់។

លោក Trump និយាយថា មេដឹកនាំវិមានក្រឹមឡាំង ប្តេជ្ញាយ៉ាងខ្លាំងក្លាថា លោកនឹងឆ្លើយតបទៅនឹងការវាយប្រហារដោយយានដ្រូនរបស់អ៊ុយក្រែនកាលពីពេលថ្មីៗនេះទៅលើមូលដ្ឋានទ័ពអាកាសរបស់យោធារុស្ស៊ី។

លោក Trump បានសរសេរនៅលើបណ្តាញ Truth Social ថា «វាជាការសន្ទនាដ៏ល្អ ប៉ុន្តែពុំមែនជាការសន្ទនាដែលនឹងនាំទៅរកសន្តិភាពភ្លាមៗនោះទេ» ដោយលោកនិយាយបន្ថែមថា ទាំងរុស្ស៊ី និងអ៊ុយក្រែនបានរងការវាយប្រហារកាលពីពេលថ្មីៗនេះ។ លោកបានបញ្ជាក់ជាថ្មី ពីបំណងចង់បញ្ចប់សង្រ្គាម ប៉ុន្តែពុំបានផ្តល់សំណើថ្មីទេ។

ការអំពាវនាវនេះ បានធ្វើឡើងប៉ុន្មានថ្ងៃបន្ទាប់ពីអ៊ុយក្រែន បានចាប់ផ្តើមប្រតិបត្តិការយានដ្រូនទ្រង់ទ្រាយធំមួយ ដែលទីក្រុងគីវ បានអះអាងថា បានបំផ្លាញយន្តហោះទម្លាក់គ្រាប់បែកមានសមត្ថភាពបំពាក់នុយក្លេអ៊ែររបស់រុស្ស៊ីជាច្រើនគ្រឿង។ លោក Trump បាននិយាយថា មេដឹកនាំទាំងពីរ បានពិភាក្សាអំពីការវាយប្រហារលើយន្តហោះដែលចតចោល និងការវាយប្រហារផ្សេងៗដែលបានកើតឡើងដោយភាគីទាំងពីរ។ លោក Trump ក៏បាននិយាយផងដែរថា លោក Putin បានបង្ហាញពីឆន្ទៈក្នុងការចូលរួម នៅក្នុងកិច្ចពិភាក្សាស្តីពីកម្មវិធីនុយក្លេអ៊ែររបស់អ៊ីរ៉ង់ ក្នុងពេលមានការព្រួយបារម្ភជាអន្តរជាតិកាន់តែខ្លាំងឡើងជុំវិញការឆ្លើយតបដែលជាប់គាំងរបស់ទីក្រុងតេអេរ៉ង់ ចំពោះអ្វីដែលហួសពីតម្រូវការផ្នែកការទូតរបស់សហរដ្ឋអាមេរិក។