ប្រទេសម៉ិកស៊ិក បានគំរាមដាក់ការដំឡើងពន្ធសងសឹក បន្ទាប់ពីសហរដ្ឋអាមេរិក បានដំឡើងពន្ធនាំចូលដែកថែប និងអាលុយមីញ៉ូមទ្វេដង ដោយធ្វើឱ្យជម្លោះពាណិជ្ជកម្មពិភពលោកកាន់តែធ្លាក់ជ្រៅ ធ្វើឲ្យរំខានដល់ទីផ្សារ និងទំនាក់ទំនងផ្នែកការទូតកាន់តែតានតឹង។

ការសម្រេចចិត្តរបស់លោកប្រធានាធិបតីអាមេរិក Donald Trump ក្នុងការដំឡើងពន្ធដល់៥០ភាគរយបានចូលជាធរមានកាលពីពាក់កណ្តាលយប់ថ្ងៃពុធ ទី៤ ខែមិថុនា ដោយអនុវត្តចំពោះប្រទេសជាច្រើនលើកលែងតែចក្រភពអង់គ្លេស ដែលទទួលបានការលើកលែងបណ្តោះអាសន្ន តាមរយៈកិច្ចព្រមព្រៀងពាណិជ្ជកម្មបឋម។

រដ្ឋមន្ត្រីក្រសួងសេដ្ឋកិច្ចម៉ិកស៊ិក លោក Marcelo Ebrard បាននិយាយថា ការដំឡើងពន្ធនេះគឺ «គ្មាននិរន្តរភាព និងអយុត្តិធម៌» ហើយបានបញ្ជាក់ថា វិធានការប្រឆាំងតបត កំពុងត្រូវបានរៀបចំ។ លោកបាននិយាយនៅក្នុងសន្និសីទសារព័ត៌មាននៅទីក្រុង Mexico City ថា «យើងពុំអាចទទួលយករឿងនេះ ដោយស្ងៀមស្ងាត់បានទេ»។

សភាពាណិជ្ជកម្មរបស់ម៉ិកស៊ិក ក៏បានជំរុញឱ្យមានវិធានការបន្ទាន់របស់រដ្ឋាភិបាល ខណៈមេដឹកនាំឧស្សាហកម្ម បានព្រមានអំពីការកើនឡើងតម្លៃផលិតកម្ម និងការបាត់បង់ការងារ នៅក្នុងវិស័យផលិតកម្មរបស់ប្រទេស។