ប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាងបាននិយាយនៅថ្ងៃព្រហស្បតិ៍ទី៥ ខែមិថុនាសប្ដាហ៍នេះថា មេដឹកនាំកូរ៉េខាងជើងលោក Kim Jong Un បានប្តេជ្ញាគាំទ្រដោយគ្មានលក្ខខណ្ឌ ចំពោះប្រទេសរុស្ស៊ីលើគ្រប់វិស័យរួមទាំងក្នុងសង្គ្រាមរបស់ខ្លួននៅអ៊ុយក្រែនផងដែរ។

ប្រទេសកូរ៉េខាងជើងបានក្លាយជាសម្ព័ន្ធមិត្តដ៏សំខាន់មួយរបស់ទីក្រុងមូស្គូក្នុងអំឡុងពេលការវាយលុកលើអ៊ុយក្រែនជាងបីឆ្នាំមកនេះ ដោយបានបញ្ជូនកងទ័ពរាប់ពាន់នាក់ដើម្បីជួយវិមានក្រឹមឡាំងបណ្តេញកងកម្លាំងអ៊ុយក្រែនចេញពីតំបន់ព្រំដែន Kursk របស់រុស្ស៊ី។

ទីភ្នាក់ងារសារព័ត៌មានកណ្តាលកូរ៉េខាងជើងKCNAបានរាយការណ៍ថា ជំនួបជាមួយមន្ត្រីសន្តិសុខកំពូលរុស្ស៊ីលោក Sergei Shoigu កាលពីថ្ងៃពុធ ក្នុងប្រទេសកូរ៉េខាងជើង លោក Kim បាននិយាយថា ទីក្រុងព្យុងយ៉ាងនឹងគាំទ្រដោយឥតលក្ខខណ្ឌចំពោះជំហររបស់រុស្ស៊ី និងគោលនយោបាយការបរទេសរបស់ខ្លួនក្នុងបញ្ហានយោបាយអន្តរជាតិសំខាន់ៗទាំងអស់ រួមទាំងបញ្ហាអ៊ុយក្រែនផងដែរ។

សារព័ត៌មាន KCNA បាននិយាយថា លោក Kim បានបង្ហាញការរំពឹងទុក និងការជឿជាក់ថា រុស្ស៊ីនឹងតែងតែទទួលបានជ័យជម្នះក្នុងបុព្វហេតុដ៏ពិសិដ្ឋនៃយុត្តិធម៌។

រុស្ស៊ី និងកូរ៉េខាងជើង បានចុះហត្ថលេខាលើកិច្ចព្រមព្រៀងយោធាដ៏ធំទូលាយមួយកាលពីឆ្នាំមុន រួមទាំងការការពារគ្នាទៅវិញទៅមក ក្នុងអំឡុងពេលដំណើរទស្សនកិច្ចដ៏កម្ររបស់មេដឹកនាំរុស្ស៊ី លោក Vladimir Putin ទៅកាន់កូរ៉េខាងជើងដែលមានអាវុធនុយក្លេអ៊ែរ៕