ប្រទេសកាណាដា បានរៀបចំវិធានការសងសឹក ដែលអាចកើតមាន ខណៈសហភាពអឺរ៉ុប បានរាយការណ៍ពីវឌ្ឍនភាពក្នុងកិច្ចចរចាពាណិជ្ជកម្ម កាលពីថ្ងៃពុធ (០៤ មិថុនា) នៅពេលដែលពន្ធលើលោហៈធាតុថ្មីរបស់សហរដ្ឋអាមេរិក បានបង្កឱ្យមានការរំខានបន្ថែមទៀតនៅក្នុងសេដ្ឋកិច្ចពិភពលោក និងបានបន្ថែមភាពបន្ទាន់ដល់កិច្ចចរចាជាមួយទីក្រុងវ៉ាស៊ីនតោន។

ការដំឡើងពន្ធទ្វេដងរបស់លោកប្រធានាធិបតី Donald Trump លើការនាំចូលដែកថែប និងអាលុយមីញ៉ូម ដល់អត្រា ៥០% ពីតួលេខ ២៥% ពីមុន បានចូលជាធរមានកាលពីថ្ងៃពុធ ជាថ្ងៃតែមួយដែលរដ្ឋបាលរបស់លោកបានស្វះស្វែងរក "សំណើផ្តល់ជូនដ៏ល្អបំផុត" ពីដៃគូពាណិជ្ជកម្ម ដើម្បីបញ្ចៀសការពិន័យពន្ធលើការនាំចូលផ្សេងទៀតមិនឱ្យចូលជាធរមាននៅក្នុងខែកក្កដា ខាងមុខ។

ការបង្កើនពន្ធចុងក្រោយនេះនឹងប៉ះពាល់ខ្លាំងដល់ដៃគូពាណិជ្ជកម្មនៅជិតខ្លួនបំផុតរបស់អាមេរិក គឺកាណាដា និងម៉ិកស៊ិក។ កាណាដាជាអ្នកនាំចេញកំពូលទាំងដែកថែប និងអាលុយមីញ៉ូម ទៅអាមេរិក។ នាយករដ្ឋមន្ដ្រី Mark Carney និយាយថា កាណាដា ត្រៀមខ្លួនជាស្រេចដើម្បីវាយបកប្រឆាំងនឹងអាមេរិក ប្រសិនបើកិច្ចពិភាក្សាជាមួយទីក្រុងវ៉ាស៊ីនតោន ដើម្បីដកពន្ធរបស់លោក Trump មិនបានសម្រេច។

ជាមួយគ្នានេះ អ្នកចរចាពាណិជ្ជកម្មរបស់ប្លុកអឺរ៉ុបនៃប្រទេសទាំង២៧ លោក Maros Sefcovic និងតំណាងពាណិជ្ជកម្មអាមេរិក លោក Jamieson Greer និយាយថា កិច្ចប្រជុំពាណិជ្ជកម្មរបស់ពួកគេនៅទីក្រុងប៉ារីស គឺមានលក្ខណៈស្ថាបនា និងវឌ្ឍនភាព។ ទោះយ៉ាងនេះក្ដី លោក Sefcovic បានសម្ដែងការសោកស្តាយចំពោះពន្ធដែកថែបទ្វេដង ដោយសង្កត់ធ្ងន់ថា អឺរ៉ុបជួបបញ្ហាប្រកួតប្រជែងដូចគ្នា - គឺភាពលើសចំណុះ - ក៏ដូចអាមេរិកលើរឿងដែកថែបដែរ ដូច្នេះភាគីទាំងពីរគួរតែធ្វើការរួមគ្នាលើបញ្ហានោះ៕