ប្រធានកាកបាទក្រហមអន្តរជាតិ បានព្រមានថា ស្ថានការណ៍នៅក្នុងតំបន់សង្រ្គាម ហ្កាហ្សា "កាន់តែអាក្រក់ជាងឋាននរកទៅទៀត" ខណៈមជ្ឈមណ្ឌលចែកចាយជំនួយក្នុងទឹកដីហ៊ុព័ទ្ធនេះ ត្រូវបានបិទមួយថ្ងៃកាលពីថ្ងៃពុធ (០៤ មិថុនា)។

មូលនិធិមនុស្សធម៌ហ្កាហ្សា (GHF) ដ៏ចម្រូងចម្រាសដែលគាំទ្រដោយសហរដ្ឋអាមេរិក បានប្រកាសកាលពីយប់ថ្ងៃអង្គារថា ខ្លួនបិទជាបណ្តោះអាសន្ននូវប្រតិបត្តិការក្នុងដែនដីនេះ បន្ទាប់ពីជនជាតិប៉ាឡេស្ទីនរាប់សិបនាក់ត្រូវបានសម្លាប់ ដោយសារប៉ុនប៉ងចូលទៅកាន់មជ្ឈមណ្ឌលចែកចាយរបស់ខ្លួន។

លោកស្រី Mirjana Spoljaric ប្រធានគណៈកម្មាធិការអន្តរជាតិនៃកាកបាទក្រហម (ICRC) បានប្រាប់សារព័ត៌មាន BBC កាលពីថ្ងៃពុធថា ស្ថានភាពតំបន់នេះបានក្លាយទៅជា "អាក្រក់ជាងឋាននរកទៅទៀត" ហើយពិភពលោកមិនប្រឹងប្រែងគ្រប់គ្រាន់ដើម្បីបញ្ចប់សង្រ្គាម បញ្ចប់ទុក្ខវេទនាដ៏ឈឺចាប់របស់ប៉ាឡេស្ទីន និងធានាការដោះលែងចំណាប់ថ្នូរអ៊ីស្រាអែលនោះទេ។

អ្នកនាំពាក្យអង្គការសហប្រជាជាតិ (UN) ធ្លាប់ព្រមាននៅទីក្រុងហ្សឺណែវ កាលពីថ្ងៃសុក្រសប្ដាហ៍មុនរួចហើយថា ហ្កាហ្សាបានក្លាយជា "កន្លែងស្រេកឃ្លានបំផុតនៅលើផែនដីនេះ" ដោយសង្កត់ធ្ងន់ថា ប្រជាជនទាំងមូលប្រឈមនឹងគ្រោះទុរ្ភិក្ស ដោយសារឧបសគ្គធ្ងន់ធ្ងរចំពោះជំនួយមនុស្សធម៌។

ពលរដ្ឋហ្កាហ្សា ពឹងផ្អែកស្ទើរទាំងស្រុងលើជំនួយមនុស្សធម៌ ដែលអ៊ីស្រាអែល បានដាក់កម្រិតយ៉ាងខ្លាំង។ ក្រុមគ្រួសារជាច្រើនពុំមានការផ្គត់ផ្គង់ស្បៀងអាហារទៀងទាត់ ដែលធ្វើឱ្យប្រជាជនប៉ាឡេស្ទីនជាងពីរលាននាក់ប្រឈមនឹងភាពអត់ឃ្លាន ស្របពេលមានការភ័យខ្លាច និងការបំផ្លិចបំផ្លាញឥតឈប់ឈរ៕