ប្រធានាធិបតីអ៊ុយក្រែន លោក Volodymyr Zelenskiy បានជំរុញសម្ព័ន្ធមិត្តលោកខាងលិចរបស់ខ្លួន កាលពីថ្ងៃពុធ (០៤ មិថុនា) ថាកុំឱ្យបង្ហាញ "ភាពទន់ខ្សោយ" ដល់លោកប្រធានាធិបតី Vladimir Putin បន្ទាប់ពីមេដឹកនាំរុស្ស៊ីរូបនេះបានគំរាមបើកការសងសឹកប្រឆាំងនឹងការវាយប្រហាររបស់អ៊ុយក្រែននាពេលថ្មីៗ នៅក្នុងជំនួបតាមទូរសព្ទជាមួយលោកប្រធានាធិបតីអាមេរិក Donald Trump។

លោក Zelenskiy បាននិយាយថា "ប្រសិនបើពិភពលោកមានប្រតិកម្មបង្ហាញភាពទន់ខ្សោយចំពោះការគំរាមកំហែងរបស់លោក Putin នោះមេដឹកនាំរុស្ស៊ីរូបនេះនឹងមើលឃើញថាជាឆន្ទៈមិនអើពើនឹងសកម្មភាពរបស់រុស្ស៊ី។ ហើយនៅពេលលោក Putin គិតថា ពុំមានកម្លាំង ឬសម្ពាធអ្វីទេ មានតែភាពទន់ខ្សោយ នោះលោកក៏នឹងប្រព្រឹត្តបទឧក្រិដ្ឋជាច្រើនទៀត"។

គួរឱ្យដឹងថា លោក Trump ព្រមានថា លោក Putin បានប្រាប់លោកថា រុស្ស៊ីនឹងត្រូវតែឆ្លើយតបទៅនឹងការវាយប្រហារយានដ្រូនដ៏ធំរបស់អ៊ុយក្រែន លើមូលដ្ឋានទ័ពអាកាសរុស្ស៊ី ហើយជំនួបតាមទូរសព្ទដែលមានរយៈពេលជាងមួយម៉ោងនោះ នឹងមិន "នាំទៅរកសន្តិភាពភ្លាមៗ" រវាងរុស្ស៊ី និងអ៊ុយក្រែនទេ។

មន្ត្រីរុស្ស៊ី បានបដិសេធមិនបញ្ជាក់រឿងនេះនៅយប់ថ្ងៃពុធ ប៉ុន្តែក្រុងមូស្គូ បាននិយាយមុននោះថា ជម្រើសយោធាគឺ "ស្ថិតលើតុពិភាក្សា" សម្រាប់ការឆ្លើយតបរបស់ខ្លួន។ នៅព្រឹកថ្ងៃព្រហស្បតិ៍ (០៥ មិថុនា) នេះ អភិបាលក្រុងអ៊ុយក្រែន និយាយថា យានដ្រូនរបស់រុស្ស៊ី បានវាយប្រហារអគារផ្ទះល្វែងក្នុងទីក្រុងធំទីពីររបស់អ៊ុយក្រែន Kharkov ដោយបង្កឱ្យមានអគ្គិភ័យ និងធ្វើឱ្យមនុស្សជាច្រើននាក់រងរបួស៕