កងកម្លាំងប្រដាប់អាវុធរបស់ប្រទេសបូលីវី បាននិយាយកាលពីថ្ងៃពុធ ទី៤ ខែមិថុនាថា ការអះអាងណាមួយនៃផែនការធ្វើរដ្ឋប្រហារប្រឆាំងរដ្ឋាភិបាលបច្ចុប្បន្ន គឺមិនពិតនោះទេ។ រឿងនេះ កើតឡើងក្នុងពេលមានភាពវឹកវរនៅទូទាំងប្រទេសកើនឡើង ដោយសារតែវិបត្តិខ្វះប្រេងឥន្ធនៈ និងខណៈអតីតប្រធានាធិបតី លោក Evo Morales កំពុងជំរុញសម្រាប់បេក្ខភាពរបស់លោកនៅក្នុងការបោះឆ្នោតនៅខែសីហា ទោះបីជាមានបម្រាមដោយរដ្ឋធម្មនុញ្ញក៏ដោយ។

នៅថ្ងៃទី២៦ ខែមិថុនា គឺជាខួបមួយឆ្នាំ ចាប់តាំងពីការប៉ុនប៉ងធ្វើរដ្ឋប្រហារបរាជ័យដឹកនាំដោយអតីតមេទ័ពយោធាជាន់ខ្ពស់ម្នាក់ដែលបានបញ្ចប់ទៅដោយមានការចាប់ខ្លួនអ្នកបង្កហេតុតាមដែលចោទប្រកាន់។

កង្វះប្រេងឥន្ធនៈ និងអតិផរណាហក់ឡើង បន្តជំរុញឱ្យពលរដ្ឋមានកំហឹងចេញធ្វើបាតុកម្ម។ នៅទីក្រុង La Paz សហជីពរបស់អ្នកបើកបរដឹកជញ្ជូនសាធារណៈ បានរៀបចំបាតុកម្មដើម្បីទាមទារការផ្គត់ផ្គង់ប្រេងឥន្ធនៈដែលមានស្ថិរភាព ដើម្បីបន្តប្រតិបត្តិការរបស់ពួកគេ។

ក្រុមហ៊ុនប្រេងគ្រប់គ្រងដោយរដ្ឋ YPFB បានប្រកាសកាលពីថ្ងៃអង្គារ ទី៣ ខែមិថុនា ថា ប្រេងឥន្ធនៈចំនួន៧៥,៧លានលីត្រ ត្រូវបានគេរំពឹងថានឹងទៅដល់ក្នុងសប្តាហ៍នេះ។

នៅទីក្រុង Cochabamba ជាទីតាំងដ៏រឹងមាំសម្រាប់ លោក Morales អ្នកគាំទ្ររបស់លោកបានបិទផ្លូវដើម្បីតវ៉ាប្រឆាំងនឹងបម្រាមរបស់រដ្ឋធម្មនុញ្ញលើបេក្ខភាពរបស់លោក ក្នុងការចូលរួមក្នុងការបោះឆ្នោត។