ដំណាក់កាលចុងក្រោយនៃសមយុទ្ធទ្រង់ទ្រាយធំរបស់សម្ព័ន្ធយោធាណាតូ «ការឆ្លើយតបភ្លាមៗ 25» ត្រូវបានធ្វើឡើងនៅទីក្រុង Xanthi ភាគឦសានប្រទេសក្រិក កាលពីថ្ងៃពុធ ទី៤ ខែមិថុនា ដោយមានកងទ័ពជាង២.៥០០នាក់ មកពីសហរដ្ឋអាមេរិក សម្ព័ន្ធមិត្ត និងដៃគូក្នុងតំបន់ ចូលរួមក្រោមការបាញ់គ្រាប់ពិតពីឧទ្ធម្ភាគចក្រ AH-64 Apache និងរថក្រោះប្រយុទ្ធឡេភឺត២ (Leopard 2) ។

សមយុទ្ធនេះ បានចាប់ផ្តើមនៅថ្ងៃទី២៦ ខែឧសភា ហើយនឹងបញ្ចប់នៅថ្ងៃទី៩ ខែមិថុនា ដោយមានកងទ័ពប្រមាណ ១២.០០០នាក់ ដែលប្រទេសចំនួន៨ធ្វើជាម្ចាស់ផ្ទះ រួមមានប្រទេសអាល់បានី ប៊ុលហ្គារី ក្រូអាត ក្រិក កូសូវ៉ូ ម៉ុងតេណេហ្គ្រោ ម៉ាសេដូនីខាងជើង និងប្រទេសស្លូវ៉ាគី។

កងកម្លាំង បានអនុវត្តនៅក្នុងការការពារតាមអ៊ីនធឺណិត ព្រឹត្តិការណ៍បណ្តុះបណ្តាលរួមបញ្ចូលគ្នា កម្មវិធីត្រៀមប្រយុទ្ធ និងការឆ្លងកាត់ទន្លេក្រោមការបាញ់គ្រាប់ពិត។

សមាជិកសម្ព័ន្ធយោធាណាតូ បានបង្កើនការចំណាយលើវិស័យការពារជាតិយ៉ាងច្រើន ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ២០២២ ហើយត្រូវបានជំរុញឱ្យបន្ត ដោយលោកប្រធានាធិបតីសហរដ្ឋអាមេរិក Donald Trump បានគំរាមមិនការពារប្រទេសណាដែលយឺតយ៉ាវក្នុងការចំណាយលើវិស័យការពារជាតិ។