មនុស្សយ៉ាងហោចណាស់ ៣៣.៤០០នាក់ ត្រូវបានបង្ខំឱ្យជម្លៀសខ្លួនចេញពីលំនៅឋានរបស់ពួកគេនៅក្នុងខេត្តចំនួន៣ របស់ប្រទេសកាណាដា និងជាច្រើននាក់បានស្លាប់ ខណៈចំហេះព្រៃដ៏រីករាលដាល កំពុងបញ្ជូនផ្សែងហុយពាសពេញព្រំដែន ចូលទៅក្នុងបណ្ដារដ្ឋភាគខាងជើងនៃសហរដ្ឋអាមេរិក និងគ្របដណ្ដប់ច្រកផ្លូវឆ្លងកាត់អាត្លង់ទិកទៅកាន់ទ្វីបអឺរ៉ុប។

គិតត្រឹមថ្ងៃពុធ (០៤ មិថុនា) មានមនុស្សស្លាប់ ២នាក់ ត្រូវបានរាយការណ៍ដោយសារតែអណ្ដាតភ្លើងដ៏សន្ធោសន្ធៅនោះ ហើយតួលេខនេះអាចកើនឡើង។ ក្រុមមន្ត្រីកាណាដា បានប្រកាសភាពអាសន្ននៅក្នុងខេត្ត Manitoba និង Saskatchewan ជាទីដែលក្រុមពន្លត់អគ្គិភ័យ និងកម្លាំងយោធា បន្តប្រតិបត្តិការក្នុងសប្តាហ៍នេះ ដើម្បីព្យាយាមទប់ទល់នឹងចំហេះព្រៃដែលមិនមានការគ្រប់គ្រងរាប់សិបកន្លែង។

មនុស្សប្រហែល ១៧.០០០នាក់ បានទទួលបញ្ជាជម្លៀសនៅក្នុងខេត្ត Manitoba ដែលភាគច្រើននៃពួកគេកំពុងស្វែងរកទីជម្រកនៅក្នុងក្រុង Winnipeg ខណៈអ្នកផ្សេងទៀតស្នាក់នៅក្នុងសណ្ឋាគារនៅខេត្ត Ontario ដែលនៅជិតខាង។ នៅខេត្ត Saskatchewan មនុស្សប្រហែល ១៥.០០០នាក់ ត្រូវបានជម្លៀសចេញនៅថ្ងៃអង្គារ នេះបើយោងតាមមន្ត្រីរបស់ខេត្ត។ នៅខេត្ត Alberta មនុស្សជាង ១.៤០០នាក់ ត្រូវបានជម្លៀសទៅកាន់ទីជម្រកក្នុងសណ្ឋាគារ និងកន្លែងស្នាក់នៅបណ្តោះអាសន្នផ្សេងទៀត។

រដូវចំហេះព្រៃរបស់កាណាដា ជាធម្មតាចាប់ផ្តើមនៅខែមេសា ហើយមានរយៈពេលរហូតដល់ចុងខែកញ្ញា ដោយសកម្មភាពភាគច្រើនកើតឡើងនៅក្នុងខែមិថុនា និងខែកក្កដា។ ទោះយ៉ាងណាក៏ដោយ ក្នុងប៉ុន្មានឆ្នាំថ្មីៗនេះ រដូវកាលចំហេះបានចាប់ផ្តើមកាន់តែលឿននៅដើមខែកុម្ភៈ ដោយសារអាកាសធាតុក្តៅ និងលក្ខខណ្ឌស្ងួតហួតហែង៕