ប្រធានាធិបតីថ្មីរបស់កូរ៉េខាងត្បូង លោក Lee Jae-myung ដែលបានស្បថចូលកាន់តំណែងកាលពីព្រឹកថ្ងៃពុធ (០៤ មិថុនា) បន្ទាប់ពីទទួលបានជ័យជម្នះក្នុងការបោះឆ្នោតនៅថ្ងៃអង្គារ បានសន្យាថា រដ្ឋបាលថ្មីរបស់លោកនឹងចាប់ផ្តើមកិច្ចសន្ទនាឡើងវិញជាមួយកូរ៉េខាងជើង ក្នុងគោលបំណងធានាសន្តិភាពនៅលើឧបទ្វីបកូរ៉េ ខណៈពេលកំពុងគូសបញ្ជាក់ពីគោលដៅគោលនយោបាយសំខាន់ៗសម្រាប់អាណត្តិប្រាំឆ្នាំរបស់លោក។

នៅក្នុងសុន្ទរកថាពិធីឡើងកាន់តំណែងទៅកាន់រដ្ឋសភាកូរ៉េខាងត្បូង លោក Lee បានសន្យាថានឹងដោះស្រាយការគំរាមកំហែងនុយក្លេអ៊ែររបស់កូរ៉េខាងជើង និងការគំរាមកំហែងផ្នែកយោធាផ្សេងទៀត ដោយប្រើ "ការរារាំងយ៉ាងខ្លាំងក្លា" ដែលជំរុញដោយសម្ព័ន្ធមិត្តយោធាកូរ៉េខាងត្បូង និងសហរដ្ឋអាមេរិក។

ជាមួយគ្នានេះ លោកក៏បាននិយាយថា លោកនឹងចាប់ផ្តើមកិច្ចពិភាក្សាឡើងវិញជាមួយទីក្រុងព្យុងយ៉ាង ដោយប្តេជ្ញាថានឹង "បើកបណ្តាញទំនាក់ទំនងជាមួយកូរ៉េខាងជើង និងបង្កើតសន្តិភាពនៅលើឧបទ្វីបកូរ៉េ តាមរយៈកិច្ចពិភាក្សា និងកិច្ចសហប្រតិបត្តិការ"។

សំណួរថាតើការសន្យានេះនឹងកើតឡើងដោយរបៀបណានៅមិនទាន់ច្បាស់នៅឡើយទេ ព្រោះទីក្រុងព្យុងយ៉ាង បានបដិសេធការចរចាជាមួយក្រុងសេអ៊ូល តាំងពីឆ្នាំ២០១៩មក។ ក្រុមអ្នករិះគន់មេដឹកនាំសេរីនិយមរូបនេះ ធ្លាប់បានចោទប្រកាន់លោកថា ងាកទៅរកប្រទេសចិន និងកូរ៉េខាងជើង និងចេញឆ្ងាយពីសហរដ្ឋអាមេរិក និងជប៉ុន ប៉ុន្តែលោក Lee បានសង្កត់ធ្ងន់ថា លោកពិតជាមានបំណងចង់បង្កើនកិច្ចសហប្រតិបត្តិការរវាងទីក្រុងសេអ៊ូល វ៉ាស៊ីនតោន និងតូក្យូ៕