ប្រទេសវេណេស៊ុយអេឡា បានវាយបកវិញ និងរិះគន់យ៉ាងចាស់ដៃទៅលើការហាមប្រាមធ្វើដំណើររបស់រដ្ឋបាលលោកប្រធានាធិបតីអាមេរិក Donald Trump ដោយព្រមានថា សហរដ្ឋអាមេរិកខ្លួនឯងគឺជាកន្លែងដ៏គ្រោះថ្នាក់ខ្លាំងណាស់ ខណៈសូម៉ាលី បានសន្យាភ្លាមៗថានឹងធ្វើការជាមួយទីក្រុងវ៉ាស៊ីនតោន លើបញ្ហាសន្តិសុខ។

ការឆ្លើយតបចម្រុះបានកើតឡើងបន្ទាប់ពីលោក Trump បានចុះហត្ថលេខាលើបម្រាម ដែលផ្តោតលើប្រទេសចំនួន១២ រួមទាំងអាហ្វហ្គានីស្ថាន អ៊ីរ៉ង់ និងយេម៉ែន ក្នុងការស្តារឡើងវិញនូវវិធានការដ៏ចម្រូងចម្រាសបំផុតមួយពីអាណត្តិដំបូងរបស់លោក។

លោក Diosdado Cabello រដ្ឋមន្ត្រីមហាផ្ទៃនៅទីក្រុងការ៉ាកាស បាននិយាយបន្ទាប់ពីសេចក្ដីប្រកាសបម្រាមនោះថា "ការរស់នៅក្នុងសហរដ្ឋអាមេរិក គឺជាហានិភ័យដ៏ធ្ងន់ធ្ងរស្រាប់ទៅហើយសម្រាប់គ្រប់គ្នា មិនមែនសម្រាប់តែប្រជាជនវេណេស៊ុយអេឡាទេ" ដោយព្រមានពលរដ្ឋប្រឆាំងនឹងការធ្វើដំណើរនៅទីនោះ ហើយពិពណ៌នារដ្ឋាភិបាលអាមេរិក ថាជាពួកហ្វាស៊ីស។

លោក Dahir Hassan Abdi ឯកអគ្គរដ្ឋទូតសូម៉ាលី ប្រចាំនៅសហរដ្ឋអាមេរិក បាននិយាយក្នុងសេចក្តីថ្លែងការណ៍មួយថា "សូម៉ាលីឱ្យតម្លៃលើទំនាក់ទំនងដ៏យូរអង្វែងរបស់ខ្លួនជាមួយអាមេរិក ហើយត្រៀមខ្លួនជាស្រេចក្នុងការចូលរួមកិច្ចសន្ទនាដើម្បីដោះស្រាយកង្វល់ដែលបានលើកឡើង"។

លោក Trump បាននិយាយថា បម្រាមនេះត្រូវបានជំរុញដោយការវាយប្រហារលើបាតុកម្មរបស់ជនជាតិជ្វីហ្វនៅរដ្ឋ Colorado ដែលអាជ្ញាធរសហរដ្ឋអាមេរិក បានស្តីបន្ទោសទៅលើបុរសម្នាក់ដែលពួកគេនិយាយថា រស់នៅក្នុងសហរដ្ឋអាមេរិកដោយខុសច្បាប់៕