ស្ថានទូតចិន ប្រចាំប្រទេសហ្វីលីពីន បានណែនាំប្រាប់ទីក្រុងម៉ានីល នៅព្រហស្បតិ៍ (០៥ មិថុនា) នេះថាកុំឱ្យ "ស្រមើស្រមៃ" អំពីការពឹងផ្អែកលើកងកម្លាំងខាងក្រៅដើម្បីដោះស្រាយជម្លោះសមុទ្រចិនខាងត្បូង ហើយបានជំរុញឱ្យសហភាពអឺរ៉ុប បញ្ឈប់ "ការបង្កបញ្ហា" លើជម្លោះដែនទឹកនេះ។

អ្នកនាំពាក្យស្ថានទូតចិន បានធ្វើអត្ថាធិប្បាយបែបនេះ បន្ទាប់ពីប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បានទៅបំពេញទស្សនកិច្ចនៅរដ្ឋធានីហ្វីលីពីន និងបានសម្តែងការព្រួយបារម្ភចំពោះសកម្មភាពរបស់ប្រទេសចិន នៅក្នុងផ្លូវទឹកដ៏មមាញឹក ជាទីដែលមានការទាមទារសិទ្ធិអធិបតេយ្យភាពត្រួតលើគ្នានៃប្រជាជាតិអាស៊ីអាគ្នេយ៍មួយចំនួន។

អ្នកនាំពាក្យរូបនោះបាននិយាយនៅក្នុងសេចក្តីថ្លែងការណ៍លើគេហទំព័រស្ថានទូតថា "សហភាពអឺរ៉ុប មិនមែនជាភាគីនៃជម្លោះសមុទ្រចិនខាងត្បូងនោះទេ ហើយពុំមានសិទ្ធិជ្រៀតជ្រែកនៅក្នុងជម្លោះសមុទ្រចិនខាងត្បូងរវាងចិន និងហ្វីលីពីនឡើយ"។

ទីក្រុងម៉ានីល និងទីក្រុងប៉េកាំង ប្រឈមមុខដាក់គ្នាកាន់តែខ្លាំងឡើងក្នុងដែនទឹកជម្លោះនៃសមុទ្រចិនខាងត្បូង។ ចិន ទាមទារស្ទើរតែទាំងអស់នូវផ្លូវទឹកយុទ្ធសាស្ត្រនេះ ដែលមានពាណិជ្ជកម្មតម្លៃ ៣សែនកោដិដុល្លារ ឆ្លងកាត់ជារៀងរាល់ឆ្នាំ ហើយនោះជាការអះអាងអធិបតេយ្យភាពត្រួតស៊ីគ្នាដោយហ្វីលីពីន ឥណ្ឌូនេស៊ី ម៉ាឡេស៊ី និងវៀតណាម៕