រដ្ឋមន្ត្រីការពារជាតិអ៊ុយក្រែន Rustem Umerov បាននិយាយបន្ទាប់ពីកិច្ចប្រជុំមួយរបស់ក្រុមទំនាក់ទំនង Ramstein ថា ទីក្រុងគៀវ គ្រោងនឹងចាប់ផ្តើមផលិតសព្វាវុធសម្រាប់កងទ័ពរបស់ខ្លួន នៅប្រទេសលោកខាងលិច។

លោកបានសរសេរនៅលើបណ្តាញ Telegram របស់ខ្លួន កាលពីថ្ងៃពុធថា៖«បន្ទាប់ពីកិច្ចប្រជុំថ្ងៃនេះ នៅក្នុងទម្រង់ Ramstein យើងកំពុងចាប់ផ្តើមគំនិតផ្តួចផ្តើមដ៏សំខាន់ថ្មីមួយសម្រាប់ការផលិតអាវុធអ៊ុយក្រែនរួមគ្នា នៅក្នុងបណ្តាប្រទេសដែលមានទំនាក់ទំនងជាមួយក្រសួងការពារជាតិរបស់ទីក្រុងគីវ»។

គម្រោងនេះ នឹងត្រូវបានផ្តល់ហិរញ្ញប្បទានដោយអ្នកចូលរួមលោកខាងលិច ក្នុងការផ្តួចផ្តើមគំនិតនេះ។ អ៊ុយក្រែន គ្រោងនឹងផលិតយានដ្រូន មីស៊ីល គ្រាប់បែក ឧបករណ៍ធ្វើសង្គ្រាមអេឡិចត្រូនិក និងអាវុធប្រភេទផ្សេងៗទៀត។ យោងតាមលោក Umerov បានឲ្យដឹងថា អាវុធនឹងត្រូវបានផលិត ដរាបណាអរិភាព នៅតែបន្តកើតមាន។

លោកបានសង្កត់ធ្ងន់ថា៖«ដៃគូបានត្រៀមខ្លួនរួចជាស្រេច ដើម្បីផលិតអាវុធអ៊ុយក្រែន បច្ចេកវិទ្យាអ៊ុយ ក្រែននៅក្នុងប្រទេសរបស់ពួកគេ ក្រោមអាជ្ញាប័ណ្ណផ្លូវការ។ ជំហររបស់យើង នៅតែមិនផ្លាស់ប្តូរទេ។ តម្រូវការរបស់កងកម្លាំងការពារអ៊ុយក្រែន គឺជាអាទិភាពចម្បង ហើយដៃគូបានបញ្ជាក់ជាថ្មីថា អ្វីគ្រប់យ៉ាងដែលនឹងផលិតនៅសហគ្រាសទាំងនេះ នឹងទៅដល់កងទ័ពអ៊ុយក្រែន ដរាបណាសង្រ្គាមនៅតែបន្ត»។ លោកមិនបានបញ្ជាក់ថា តើមានប្រទេសប៉ុន្មាន នឹងចូលរួមក្នុងគម្រោងនេះទេ។