បើយោងតាមបុរីវ៉ាទីកង់ កាលពីថ្ងៃពុធ (ទី៤ ខែមិថុនា) បានឲ្យដឹងថា សម្តេច ប៉ាប ឡេអូ (Pope Leo) បានជំរុញឲ្យប្រទេសរុស្ស៊ីចាត់វិធានការឆ្ពោះទៅរកការបញ្ចប់ជម្លោះ ក្នុងប្រទេសអ៊ុយក្រែន នៅពេលដែលព្រះអង្គបានមានព្រះបន្ទូលជាមួយប្រធានាធិបតី លោក Vladimir Putin ជាលើកដំបូង។

បុរីវ៉ាទីកង់បានឲ្យដឹងថា៖ «សម្តេច ប៉ាប បានអំពាវនាវឲ្យរុស្ស៊ីមាននូវកាយវិការគាំទ្រដល់សន្តិភាព ដោយសង្កត់ធ្ងន់លើសារៈសំខាន់នៃការសន្ទនា ដើម្បីសម្រេចបាននូវទំនាក់ទំនងវិជ្ជមាន រវាងភាគីទាំង២ និងការស្វែងរកដំណោះស្រាយបញ្ចប់ជម្លោះ»។

ជាមួយគ្នានេះ បុរីវ៉ាទីកង់ក៏បានបញ្ជាក់ថា សម្ដេច Leo ដែលជាសម្តេចប៉ាបអាមេរិកទី១ បានជួបតាមទូរសព្ទជាមួយមេដឹកនាំរុស្ស៊ី កាលពីរសៀលថ្ងៃទី៤ ខែមិថុនា។ ការឲ្យដឹងព័ត៌មានជជែកតាមទូរសព្ទនេះ គឺខុសពីធម្មតា សម្រាប់បុរីវ៉ាទីកង់ ដែលតែងតែមិនចេញនូវសេចក្តីថ្លែងការណ៍នោះឡើយ អំពីការជជែកតាមទូរសព្ទរបស់សម្តេច ប៉ាប។

បុរីវ៉ាទីកង់បានបន្ថែមថា៖ «អំឡុងការជជែកនោះ មានការពិភាក្សា អំពីស្ថានភាពមនុស្សធម៌ តម្រូវការក្នុងការសម្របសម្រួលជំនួយ ក្នុងករណីចាំបាច់ និងបន្តកិច្ចប្រឹងប្រែងដោះដូរអ្នកទោស»។

បើយោងតាមវិមានក្រឹមឡាំង បានឲ្យដឹងថា លោកប្រធានាធិបតី Putin បានអរព្រះគុណដល់សម្តេច ប៉ាប ឡេអូ ដែលបានក្លាយជាសម្តេចសង្ឃកាតូលិកកាលពីជិត ៤សប្តាហ៍មុន សម្រាប់ការផ្តល់ជំនួយ ក្នុងការដោះស្រាយជម្លោះ ហើយបានប្រាប់ព្រះអង្គថា អ៊ុយក្រែនមានចេតនាធ្វើឲ្យសង្រ្គាមឡើងកម្ដៅខ្លាំងទៅៗ៕