ប្រទេសរុស្ស៊ី កាលពីថ្ងៃពុធ (ទី៤ ខែមិថុនា) បានសម្តែងក្ដីបារម្ភយ៉ាងខ្លាំង អំពីការកើនឡើងនូវភាពតានតឹង ជុំវិញបញ្ហាអ៊ីរ៉ង់ និងហានិភ័យនៃការមានជម្លោះកាន់តែរាលដាលធំទៅៗ។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មាន នៅទីក្រុងមូស្គូថា៖ «យើងមានក្ដីបារម្ភយ៉ាងខ្លាំង អំពីភាពតានតឹងដែលកំពុងកើនឡើង នៅជុំវិញបញ្ហាអ៊ីរ៉ង់ និងហានិភ័យនៃការធ្លាក់ចូលទៅក្នុងស្ថានការណ៍ប្រឈមមុខដាក់គ្នាពេញបន្ទុក»។

ការព្រមាននេះកើតមានឡើង ក្នុងពេលដែលកិច្ចប្រឹងប្រែងការទូត ដើម្បីដោះស្រាយការប្រឈមមុខដាក់គ្នាខាងនុយក្លេអ៊ែររបស់អ៊ីរ៉ង់ ហាក់ដូចជាទៅមុខលែងរួច។

គួរបញ្ជាក់ថា កាលពីព្រឹកថ្ងៃពុធ មេដឹកនាំកំពូលអ៊ីរ៉ង់ លោក Ali Khamenei បានច្រានចោលសំណើពាក់ព័ន្ធនឹងកម្មវិធីនុយក្លេអ៊ែរចុងក្រោយបង្អស់ពីសហរដ្ឋអាមេរិក ដោយបានកត់សម្គាល់ពីការបរាជ័យមួយផ្សេងទៀត ក្នុងការប៉ុនប៉ងស្តារការចរចាឡើងវិញ។ លោក Khamenei បាននិយាយថា សំណើសម្រាប់កិច្ចព្រមព្រៀងនុយក្លេអ៊ែរ គឺផ្ទុយនឹងផលប្រយោជន៍ជាតិរបស់ទីក្រុងតេអេរ៉ង់ ហើយថា ប្រទេសនេះនឹងមិនបោះបង់ចោលការចម្រាញ់សារធាតុអ៊ុយរ៉ានីញ៉ូមជាដាច់ខាត។

តែយ៉ាងណាក្ដី បើទោះបីជាបបានបដិសេធកិច្ចព្រមព្រៀងក្នុងទម្រង់បច្ចុប្បន្ននេះក៏ដោយ ក៏មេដឹកនាំកំពូលរូបនេះមិនបានបង្ហាញថា អ៊ីរ៉ង់នឹងដកខ្លួនចេញពីកិច្ចចរចាទាំងស្រុងនោះដែរ។ សំណើរបស់សហរដ្ឋអាមេរិក សម្រាប់កិច្ចព្រមព្រៀងនុយក្លេអ៊ែរថ្មីមួយ ត្រូវបានបង្ហាញដល់ប្រទេសអ៊ីរ៉ង់ កាលពីថ្ងៃសៅរ៍ចុងសប្ដាហ៍កន្លងមក ដោយប្រទេសអូម៉ង់ ដែលបានជួយសម្របសម្រួលកិច្ចចរចា រវាងរដ្ឋមន្ត្រីការបរទេសអ៊ីរ៉ង់លោក Abbas Araghchi និងលោក Steve Witkoff បេសកជនប្រចាំតំបន់មជ្ឈិមបូព៌ារបស់ប្រធានាធិបតី លោក Donald Trump៕