ការស្ទង់មតិមួយ កាលពីថ្ងៃពុធ (ទី៤ ខែមិថុនា) នេះ បានបង្ហាញថា ប្រជាជនអាល្លឺម៉ង់ប្រមាណជា ៧៣ភាគរយ ចង់ឲ្យមានការគ្រប់គ្រងកាន់តែតឹងរ៉ឹង លើការនាំចេញអាវុធទៅកាន់អ៊ីស្រាអែល ក្នុងនោះ ៣០ភាគរយគាំទ្រឲ្យមានការហាមប្រាមទាំងស្រុងតែម្ដង ដោយនេះជាការឆ្លុះបញ្ចាំងពីការមិនពេញចិត្តជាសាធារណៈកាន់តែខ្លាំងឡើងៗ ចំពោះគោលនយោបាយរបស់រដ្ឋាភិបាល ជាមួយអ៊ីស្រាអែល ។

ចាប់តាំងពីមានការវាយប្រហាររបស់ក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល អាល្លឺម៉ង់នៅតែជាសម្ព័ន្ធមិត្តដ៏រឹងមាំបំផុតរបស់អ៊ីស្រាអែល និងជាអ្នកផ្គត់ផ្គង់អាវុធធំទី២ របស់ប្រទេសនេះ បើទោះបីជាអ៊ីស្រាអែលកាន់តែមានភាពឯកោជាអន្តរជាតិ និងរងនូវការរិះគន់ខ្លាំងឡើងៗ ចំពោះសង្គ្រាមដ៏បំផ្លិចបំផ្លាញរបស់ខ្លួន នៅតំបន់ហ្កាហ្សាក៏ដោយ។

បើយោងតាមការឆ្លើយតបទៅនឹងការស៊ើបអង្កេតរបស់សភាដែលបានចេញផ្សាយ កាលពីថ្ងៃអង្គារ (ទី៣ ខែមិថុនា) រវាងការវាយប្រហាររបស់ក្រុមហាម៉ាស និងពាក់កណ្តាលខែឧសភាឆ្នាំនេះ អាល្លឺម៉ង់បានអនុម័តការនាំចេញគ្រឿងយុទ្ធោបករណ៍ទៅអ៊ីស្រាអែលតម្លៃ ៤៨៥លានអឺរ៉ូ (៥៥៣លានដុល្លារ)។ ការចែកចាយ រួមមានអាវុធ គ្រាប់រំសេវ គ្រឿងបន្លាស់អាវុធ ឧបករណ៍ពិសេសៗ សម្រាប់កងទ័ព និងកងទ័ពជើងទឹក ឧបករណ៍អេឡិចត្រូនិក និងរថពាសដែកពិសេស។ យ៉ាងណាក្ដី មិនទាន់មានពាក្យបណ្ដឹងណាមួយដែលជំទាស់នឹងការនាំចេញអាវុធរបស់អាល្លឺម៉ង់ទៅអ៊ីស្រាអែលនៅឡើយទេ ក្នុងនោះរួមទាំងបណ្ដឹងដែលលើកឡើងដោយប្រទេសនីការ៉ាហ្គា នៅតុលាការយុត្តិធម៌អន្តរជាតិផងដែរ។

ការស្ទង់មតិដែលត្រូវបានធ្វើឡើងក្នុងចំណោមអ្នកឆ្លើយតបចំនួន ១.២៩២នាក់ នៅថ្ងៃទី ២-៣ ខែមិថុនា ក៏បានរកឃើញថា ៥៥ភាគរយ ច្រានចោលគំនិតដែលថា អាល្លឺម៉ង់មានការទទួលខុសត្រូវពិសេសការពារអ៊ីស្រាអែល ដោយសារតែមរតកនៃការសម្លាប់រង្គាលលើជនជាតិជ្វីហ្វ នៅអឺរ៉ុប អំឡុងសម័យណាស៊ី។ ១៣ភាគរយនៃអ្នកដែលត្រូវបានស្ទង់មតិ ជឿថា អាល្លឺម៉ង់គួរតែឈរខាងអ៊ីស្រាអែលដោយគ្មានលក្ខខណ្ឌ ក្នុងជម្លោះ នៅមជ្ឈិមបូព៌ា ខណៈដែល ៧៤ភាគរយ ជំទាស់នឹងជំហរបែបនេះ។ លើសពីនេះទៀត ៦៣ភាគរយ បានលើកឡើងថា ការឆ្លើយតបខាងយោធារបស់អ៊ីស្រាអែល នៅតំបន់ហ្កាហ្សា កាន់តែហួសហេតុហើយ ដោយកើនឡើង ៦ភាគរយ គិតចាប់តាំងពីខែសីហា ខណៈដែល ៧៣ភាគរយ ចាត់ទុកថាសកម្មភាពយោធារបស់អ៊ីស្រាអែលមិនសមហេតុផលនោះឡើយ៕