រដ្ឋមន្រ្តីក្រសួងមហាផ្ទៃអ៊ុយក្រែនលោក Ihor Klymenko និយាយនៅថ្ងៃព្រហស្បតិ៍នេះថា ការវាយប្រហារយានដ្រូនរុស្ស៊ីកាលពីយប់កន្លងទៅលើទីក្រុងភាគឦសាន Kharkiv របស់អ៊ុយក្រែន បណ្តាលឲ្យមនុស្ស ១៨នាក់ រងរបួស រួមទាំងកុមារ ៤នាក់ផងដែរ ។

អភិបាលក្រុង Kharkiv លោក Ihor Terekhov និយាយថា ការវាយប្រហារកាលពីយប់កន្លងទៅ បណ្តាលឲ្យខូចខាតអគារផ្ទះល្វែង ៧ខ្នង ក្នុងនោះអគារផ្ទះល្វែង ២ខ្នង រងផលប៉ះពាល់ដោយផ្ទាល់ ។

អ្នកស្រី Anastasiia Meleshchenko គឺជាអ្នកស្រុកមួយរូបរស់នៅក្នុងទីក្រុង Kharkiv និយាយប្រាប់ទីភ្នាក់ងារព័ត៌មានរ៉យទ័រថា ពួកយើងកំពុងដេកលក់ ។ ក្រោយការផ្ទុះដំបូង ពួកយើងបានរត់ចេញពីផ្ទះ ពេលនោះហើយដែលពួកយើងបានឮសំឡេងផ្ទុះលើកទី ២នៃការវាយប្រហាររបស់យានដ្រូនលើអគារផ្ទះល្វែងរបស់ពួកយើង ។

អ្នកស្រីបន្តថា កាលពីថ្ងៃម្សិលមិញ កម្មករទើបបញ្ចប់ការងារជួសជុលផ្ទះល្វែងរបស់គាត់ទេ ក្រោយការវាយប្រហារលើកមុន ។

រថយន្តរងការឆាបឆេះ ត្រូវបានគេមើលឃើញនៅលើផ្លូវ ហើយក្រុមការងារសង្រ្គោះបន្ទាន់ បានអង្កេតផលប៉ះពាល់នៅក្រៅកន្លែងកើតហេតុនៃការវាយប្រហារ ។ នៅមិនទាន់មានសេចក្តីអត្ថាធិប្បាយភ្លាមៗនោះទេពីរុស្ស៊ី ៕