លោក Andriy Yermak ដែលជាជំនួយការប្រធានាធិបតីអ៊ុយក្រែនលោក Volodymyr Zelenskiy និយាយថា លោកបានជួបជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio នៅទីក្រុងវ៉ាស៊ីនតោន ឌីស៊ី អំឡុងដំណើរទស្សនកិច្ចរបស់លោកទៅកាន់ទីនោះ ។

លោក Yermak និយាយប្រាប់ក្រុមអ្នកសារព័ត៌មាន ក្រោយជំនួបនៅទីក្រុងវ៉ាស៊ីនតោនថា វាសំខាន់ខ្លាំងណាស់កាលដែលអ៊ុយក្រែនឈ្នះសង្រ្គាមជាមួយរុស្ស៊ី ។

លោក Yermakនិយាយថា អ្វីដែលលោកដឹងច្បាស់ដូចដែលលោកបាននិយាយអញ្ចឹងថា កិច្ចសហប្រតិបត្តិការរបស់ពួកយើងនៅតែបន្ត ។ ពួកយើងបានពិភាក្សាលើជំហានបន្ទាប់ ហើយអំឡុងពេល ២ថ្ងៃនេះ ពួកយើងមានឱកាសជជែកគ្នាច្រើន ទាំងនៅសេតវិមាន នៅក្រសួងការបរទេសសហរដ្ឋអាមេរិក និងនៅលើភ្នំ ។

ជំនួបមួយនេះ បានកើតមានឡើងនៅថ្ងៃតែមួយដែលប្រធានាធិបតីរុស្ស៊ីលោក Vladimir Putin និយាយប្រាប់ប្រធានាធិបតីសហរដ្ឋអាមេរិកលោក Donald Trump ថា លោកត្រូវតែឆ្លើយតបចំពោះការវាយប្រហារយានដ្រូនអ៊ុយក្រែនលើកងយន្តហោះទម្លាក់គ្រាប់បែកមានសមត្ថភាពនុយក្លេអ៊ែររបស់រុស្ស៊ី ខណៈលោកចាត់ទុកផងដែរថា កិច្ចប្រជុំសន្តិភាពជាមួយអ៊ុយក្រែនមានសារសំខាន់ ។

សង្រ្គាមនៅអ៊ុយក្រែនកំពុងឡើងកម្តៅខ្លាំង ក្រោយរយៈពេលជិត ២ខែនៃការលួងលោម និងការគំរាមកំហែងដល់ទីក្រុងម៉ូស្គូ និងទីក្រុងគីវ ពីសំណាក់លោក Trumpដែលនិយាយថា លោកចង់បានសន្តិភាព បន្ទាប់ពីកើតមានសង្រ្គាមរយៈពេល ៣ឆ្នាំ ដែលជាជម្លោះស្លាប់មនុស្សច្រើនបំផុតនៅអឺរ៉ុប ចាប់តាំងពីសង្រ្គាមលោកលើកទី ២ ៕