ភ្នំពេញ ៖ នៅរសៀលថ្ងៃទី៥ ខែមិថុនា ឆ្នាំ២០២៥ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិ ត្តិយសនៃមូលនិធិគន្ធបុប្ផាកម្ពុជាបានអញ្ជើញជួបសវនការ និងទទួលថវិកាចំនួន៧០ម៉ឺនដុល្លារពីសប្បុ រសជន ដើម្បីធានានិរន្តរភាពមន្ទីរពេទ្យគន្ធបុប្ផា។​

ក្នុងឱកាសជួបសំណេះសំណាលជាមួយនឹងក្រុមយុវជនបូជាការពារយុត្តិធម៌នៅថ្ងៃនេះលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បាននាំនូវប្រសាសន៍ផ្តាំផ្ញើសួរសុខទុក្ខពីសម្តេចធិបតី ហ៊ុន ម៉ាណែត នាយករដ្ឋមន្ត្រី ជូនចំពោះសមាជិកក្រុមយុវជនបូជាការពារយុត្តិធម៌ជាពិសេសអ្នកឧកញ៉ា ឡេង ណាវ៉ាត់ត្រា ដែលបានដឹកនាំក្រុមការងារចូលរួមបរិច្ចាគថវិកាជូនមូលនិធិគន្ធបុប្ផាកម្ពុជានាឱកាសនេះ។

លោកជំទាវបណ្ឌិតក៏បានកោតសរសើរដល់ក្រុមយុវជនទាំងអស់ ដែលបានចូលរួមបរិច្ចាគថវិកាដ៏ច្រើ នដល់កិច្ចដំណើរការរបស់មន្ទីរពេទ្យគន្ធបុប្ផា តាមរយៈមូលនិធិគន្ធបុប្ផាកម្ពុជាក្នុងឱកាសយុទ្ធនាការ «១ម៉ឺនរៀល ១ម៉ឺននាក់» ក្នុងការស្វែងរកថវិកាជួយមន្ទីរពេទ្យគន្ធបុប្ផា ដែលមានរយះពេល១ខែពេញ ចាប់ពីថ្ងៃទី១មិថុនា ដល់ថ្ងៃទី៣០ មិថុនា ២០២៥។ លោកជំទាវបានថ្លែងអំណរគុណអស់ពីដួងចិត្ត ដល់ក្រុមយុវជនដែលបានជួយដល់មូលនិធិគន្ធបុប្ផាកម្ពុជា ព្រមទាំងបានជួយឧបត្ថមគាំទ្រដល់កងទ័ពជួរមុខដែលកំពុងការពារទឹកដីតាមបន្ទាត់ព្រំដែនប្រកបដោយស្មារតីសាមគ្គីភាពរឹងមាំរបស់ប្រជាជាតិខ្មែរទាំងមូល។

ក្នុងជំនួបនោះដែរ លោកជំទាវបណ្ឌិតក៏បានស្នើដល់អ្នកបង្កើតមាតិកា ដែលមានប្រជាប្រិយភាពនៅតាមបណ្ដាញសង្គមនានា សូមជួយជំរុញការផ្សព្វផ្សាយយុទ្ធនាការនេះបន្ថែមទៀត ដើម្បីឲ្យមានការផុលផុស នឹងមានការចូលរួមពីសប្បុរសជនជួយដល់កុមារកម្ពុជាដែលកំពុងត្រូវការជំនួយបន្ថែមទៀត។

អ្នកឧកញ៉ា ឡេង ណាវ៉ាត់ត្រា ប្រធានក្រុមយុវជនបូជាការពារយុត្តិធម៌ បានគោរពថ្លែងអំណរគុណដល់លោកជំទាវបណ្ឌិតប្រធានកិត្តិយសនៃមូលនិធិគន្ធបុប្ផាកម្ពុជាដែលបានផ្តល់ឱកាសឲ្យក្រុមការងារបាន ចូលរួមចែករំលែកនូវធនធាន ដើម្បីជួយទ្រទ្រង់ដល់មូនិធិនេះ និងសូមអរគុណដល់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានបង្កើតឲ្យមានមូលនិធិនេះឡើង។ អ្នក ឧកញ៉ា និងក្រុមការងារក៏បានប្ដេជ្ញាជួយដល់មូលនិធិនេះ និងជួយដល់កិច្ចការសង្គមជាបន្តបន្ទាប់ទៀត ដើម្បីជាតិ ដើម្បីសង្គម ក្នុងន័យស្មារតីខ្មែរជួយខ្មែរ៕

អត្ថបទ៖ សំ ងីម