រថយន្តក្រុងរបស់ក្រុមហ៊ុនដឹកជញ្ជូន SEPTA ជាច្រើនគ្រឿង បានឆាបឆេះជាអគ្គិភ័យឡើងនៅដឺប៉ូរក្សាទុករថយន្តក្រុង ស្ថិតក្នុងទីក្រុង Philadelphia រដ្ឋ Pennsylvania សហរដ្ឋអាមេរិក ធ្វើឲ្យសំណុំផ្សែងយ៉ាងក្រាស់ឃ្មឹកហុយឡើងអាកាស ។

ក្រុមមន្រ្តីនិយាយថា អគ្គិភ័យនេះ បានកើតឡើងនៅក្រោយឃ្លាំងស្តុកសម្ភារៈផ្លូវដែក Roberts Yard SEPTA និងដឺប៉ូរក្សាទុករថយន្តក្រុង Midvale ។

លោក Andrew Busch គឺជាអ្នកនាំពាក្យក្រុមហ៊ុន SEPTA និយាយថា ទីតាំងមួយនេះ ជាកន្លែងរក្សាទុករថយន្តបោះចោល ជាទីដែលរថយន្តក្រុងលែងប្រើប្រាស់ទាំងអស់ ស្តុកទុកនៅទីនោះ ។ អគ្គិភ័យនេះ មិនបានប៉ះពាល់ដល់រថយន្តក្រុងកំពុងប្រើប្រាស់នោះទេ ។

ទោះបីជាយ៉ាងណាក៏ដោយ ក្រុមមន្រ្តីនិយាយថា អគ្គិភ័យនេះ បណ្តាលឲ្យមានការបិទផ្លូវនៅតំបន់មហាវិថី Roosevelt ជិតរុក្ខវិថី Germantown ស្ថិតក្នុងសួនកម្សាន្ត Hunting ។ មនុស្សត្រូវបានជំរុញឲ្យចៀសចេញពីតំបន់នោះ ៕