ប្រទេសនានាជុំវិញពិភពលោកមានការភ្ញាក់ផ្អើលកាលពីថ្ងៃព្រហស្បតិ៍សប្ដាហ៍នេះ ក្រោយប្រធានាធិបតី លោកDonald Trump បានប្រកាសហាមប្រាមការធ្វើដំណើរលើជនជាតិមកពីប្រទេសរាប់សិប និងការលុបចោលកម្មវិធីទិដ្ឋាការចំនួនប្រាំពីរបន្ថែមទៀត។ សម្រាប់មនុស្សជាច្រើន វិធានការនេះ ហាក់ដូចជាការវិលត្រឡប់ទៅកាន់ឆ្នាំ ២០១៧ វិញ និងជាគោលនយោបាយដ៏ចម្រូងចម្រាសបំផុតមួយនៃអាណត្តិដំបូងរបស់លោក Trump ។

ក្រុមផ្ដល់ជំនួយអន្តរជាតិបានថ្កោលទោសបម្រាមនេះខណៈអង្គការលើកលែងទោសអន្តរជាតិកាលពីថ្ងៃព្រហស្បតិ៍បានហៅវិធានការនេះថាជាការរើសអើង រើសពូជន៍សាសន៍និងការបំពាន។ 

លោក Trump បានលើកឡើងពីកង្វល់សន្តិសុខជាតិ និងអំពើភេរវកម្មកាលពីថ្ងៃពុធថាជាកត្តាជំរុញទឹកចិត្តនៅពីក្រោយការហាមប្រាមជនជាតិភាគច្រើនមកពីទ្វីបអាហ្រ្វិក និងអាស៊ី ដែលបង្កឱ្យមានប្រតិកម្មពីតំណាងនៃប្រទេសទាំងនោះចាប់ពីការនឿយហត់ខាងការទូតរហូតដល់ការផ្ទុះកំហឹង។



ឆាដ ជាប្រទេសមួយនៅអាហ្រ្វិកកណ្តាល ដែលស្ថិតក្នុងចំណោមប្រទេសរងការហាមប្រាមការធ្វើដំណើរនោះ បានចេញការរឹតបន្តឹងទៅវិញទៅមកភ្លាមៗលើការចេញទិដ្ឋាការដល់ពលរដ្ឋអាមេរិក។ លោកប្រធានាធិបតី Idriss Deby បានសរសេរកាលពីថ្ងៃព្រហស្បតិ៍នៅលើបណ្ដាញសង្គម Facebook ថា ប្រទេសឆាដមិនមានយន្តហោះដើម្បីផ្តល់ជូននោះទេ គ្មានប្រាក់រាប់ពាន់លានដុល្លារដើម្បីផ្តល់ឱ្យនោះទេ ប៉ុន្តែប្រទេសឆាដមានសេចក្តីថ្លៃថ្នូរ និងមោទនភាពរបស់ខ្លួន។

បទបញ្ជាថ្មីរបស់លោក Trump ប៉ះពាល់ដល់បណ្ដាញការងាររបស់ប្រទេសចំនួន ១៩ ដែលមួយចំនួនត្រូវបានហាមប្រាមជាលើកដំបូង សម្រាប់ហេតុផលដែលរដ្ឋបាលលោកនិយាយថា រួមមានអត្រាខ្ពស់នៃការស្នាក់នៅលើសការកំណត់ទិដ្ឋាការ កង្វះវិធានការត្រួតពិនិត្យ និងតាមដានសមស្រប និងត្រូវបានចោទប្រកាន់ថាជាអ្នកគាំទ្រភេរវកម្ម។

ជនជាតិនៃប្រទេសចំនួន ១២ នឹងត្រូវបានហាមប្រាមមិនឱ្យជាន់ទឹកដីសហរដ្ឋអាមេរិកដែលនឹងចូលជាធរមាននៅថ្ងៃចន្ទសប្ដាហ៍ក្រោយ  មាន អាហ្វហ្គានីស្ថាន មីយ៉ាន់ម៉ា ឆាដ សាធារណរដ្ឋកុងហ្គោ        ហ្គីណេអេក្វាទ័រ អេរីត្រេ ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។ ការហាមប្រាមមួយផ្នែកក៏ត្រូវបានដាក់លើជនជាតិមកពីប៊ូរុនឌី គុយបា ឡាវ សៀរ៉ាឡេអូន តូហ្គោ តួកម៉េនីស្ថាន និងវ៉េណេស៊ុយអេឡាផងដែរ៕